வர்த்தகர்கள் கொலை தொடர்பில் ரத்கமவில் ஆர்ப்பாட்டம்

ரத்கம - காலி வீதியில் பாரிய ஆர்ப்பாட்டம் ஒன்று முன்னெடுக்கப்படுகின்றது. இந்த எதிர்ப்பு நடவடிக்கை காரணமாக அவ்வீதி ஊடான போக்குவரத்து முற்றாக பாதிப்பு அடைந்துள்ளதாக தெரிவிக்கப்படுகின்றது. ரத்கம - உதாகம பிரதேசத்தை சேர்ந்த இரண்டு வர்த்தகர்கள் அண்மையில் காணாமல் போயிருந்தனர். பின்னர் அவர்கள் கொலை செய்யப்பட்டு இருந்தனர். இதன் காரணமாக உயிரிழந்தவர்களின் உறவினர்கள் மற்றும் ஊர் மக்கள் இணைந்து இந்த எதிர்ப்பு ஆர்ப்பாட்டத்தை நடத்துகின்றனர்.

கடந்த ஜனவரி 23ம் திகதி குறித்த இரண்டு வர்த்தகர்களும் கடத்திச் செல்லப்பட்டுள்ளதுடன், இருவரினதும் சடலங்கள் தீயிட்டு எரிக்கப்பட்டுள்ளதாக பொலிஸ் ஊடகப் பேச்சாளர் ருவன் குணசேகர கூறியிருந்தார்.

இதனிடையே, வர்த்தகர்கள் இருவர் கொலை செய்யப்பட்ட சம்பவம் தொடர்பாக மேலும் சிலர் கைது செய்யப்படவுள்ளதாக, குற்றத்தடுப்பு விசாரணை திணைக்களம் தெரிவித்துள்ளது. கொலை செய்யப்பட்ட வர்த்தகர்களுடையதென சந்தேகிக்கப்படும் மனித எச்சங்கள் நேற்று மீட்கப்பட்டதுடன், அவை மரபணு பரிசோதனைக்காக அனுப்பப்படவுள்ளதாக குற்றத்தடுப்பு விசாரணை திணைக்களம் மேலும் தெரிவித்துள்ளது.

இந்த சம்பவம் தொடர்பில், தென் மாகாண விசேட விசாரணை பிரிவின் உப பொலிஸ் பரிசோதகர் ஒருவர் நேற்று கைது செய்யப்பட்டார்.

அவரிடம் மேற்கொள்ளப்பட்ட ஆரம்பகட்ட விசாரணைகளிலிருந்து, குறித்த வர்த்தகர்கள் இருவரும் கடத்தப்பட்டு அக்மீமன – கொனாமுல்ல பிரதேசத்தில் உள்ள வீடொன்றில் வைத்து கொலை செய்யப்பட்டுள்ளமை தெரியவந்துள்ளது. அத்தோடு கொலை செய்யப்பட்ட பின்னர், அவர்களது உடல்கள் வலஸ்முல்ல – மெதகம்கொட – கனுமுல்தெனிய வனப்பகுதியில் எரிக்கப்பட்டுள்ளதாக பொலிஸாரின் விசாரணைகள் மூலம் வெளியாகியுள்ளது.

இந்நிலையில், வர்த்தகர்கள் கொலை செய்யப்பட்டதாக சந்தேகிக்கப்படும் கொனாமுல்ல பிரதேசத்தில் உள்ள வீடொன்றை காலி பிரதான நீதவான் மற்றும் காலி உதவி சட்ட மருத்துவ அதிகாரி ஆகியோர் பரிசோதனைக்கு உட்படுத்தியுள்ளனர். இதே நேரம், குறித்த வீட்டின் உரிமையாளரிடம் குற்றத்தடுப்பு விசாரணை திணைக்கள அதிகாரிகள் விசாரணைகளை மேற்கொண்டு வருகின்றனர்.

எவ்வாறான போதிலும் இரண்டு வர்த்தகர்களும் கடத்தப்பட்டு கொலை செய்யப்பட்டமைக்கான காரணம், இதுவரையில் கண்டறியப்படவில்லை என பொலிஸ் ஊடக பேச்சாளர் ருவன் குணசேகர தெரிவித்துள்ளார்.