முடிவடைந்த யுத்தம் தொடர்பில் மரண விசாரணை தேவையில்லை.. புலம்பெயர் தமிழர் தமிழ் மக்களுக்கு எதனை செய்தனர் கேட்கிறார் தயா மாஸ்டர்.

புலிகளமைப்பின் பிரச்சாரப் புயலாக இருந்தவர் தயா மாஸ்டர். தற்போது வடக்கை தளமாக கொண்டுள்ள டான் ரீவி யில் பணியாற்றுகின்றார். இவர் இந்தியாவின் ஹிந்துஸ்தான் டைம்ஸ் பத்திரிகைக்கு வழங்கிய செவ்வியில், புலம்பெயர் தமிழர் அமைப்பும், தமிழ்நாடு அரசியல் வாதிகளும், இலங்கை தமிழ்மக்களுக்காக எதனையும் புரியவில்லை என்றும் மூன்றாண்டுகளுக்கு முன்னர் முடிவடைந்த யுத்தம் தொடர்பாக, மேலதிக மரண விசாரணை நடாத்துவதில் பயனில்லையென்றும் தெரிவித்துள்ளார்.

மேலும் தமிழ்நாடு அரசியல் வாதிகள், இலங்கையில் உள்ள சிங்கள மற்றும் தமிழ் மக்களுக்கிடையே வீண் மோதல்களையும், முரண்பாடுகளையும் உருவாக்குவதற்கு முயற்சித்து வருவதாகவும், தயா மாஸ்டர் குற்றம் சாட்டியுள்ளார்.

இந்திய அரசாங்கம் வடக்கில் வீடுகளை நிர்மாணித்து, ரயில் பாதைகளை புனரமைத்து, அபிவிருத்திப் பணிகளுக்கு பங்களிப்பு செய்து வரும் இந்த சந்தர்ப்பத்தில், தமிழ்நாட்டில் உள்ள அரசியல் கட்சிகள், தமிழ் மக்களுக்காக எதனை புரிந்தார்கள் என்றும் அவர் கேள்வி எழுப்பியுள்ளார்.

புலம்பெயர் தமிழர்கள் வெளிநாடுகளில் இருந்து கொண்டு குரல் எழுப்பிய போதிலும், இந்நாட்டில் வாழும் தமிழ் மக்களுக்காக, அவர்கள் எதனை சாதிக்கப்போகின்றார்கள் என்றும், அவர் வினவியுள்ளார். அவர்களிடம், எந்தவிதமான பயனுள்ள திட்டங்களும் இல்லையென்றும், அவர் குற்றம் சாட்டியுள்ள தயா மாஸ்ரர் தமிழ் மக்களின் பேரால், தொடர்ந்தும் நிதி சேகரிப்பதற்கே, இந்த புலம் பெயர் தமிழர்கள் முயற்சித்து வருவதாகவும் தெரிவித்துள்ளார்.

உள்நாட்டின் அரசியல் எதிர்காலத்தை இலங்கையர்களிடம் ஒப்படைத்துவிட்டு, சர்வதேச சமூகம் இங்கு மேற்கொள்ளப்படும் அபிவிருத்தி பணிகளுக்கு மாத்திரம் பங்களிப்பு செய்யலாமென்றும், அவர் குறிப்பிட்டுள்ளார்.

கைது செய்யபபட்டுள்ள தமிழ கைதிகள் இன்னல்களுக்கு உட்படுத்தப்படுவதாக, சர்வதேச சமூகம் சுமத்தும் குற்றச்சாட்டு தொடர்பாக, ஹிந்துஸ்தான் டைம்ஸ் செய்தியாளர் எழுப்பிய கேள்விக்கு பதிலளித்த தயா மாஸ்டர், தானும் கைது செய்யப்பட்டிருந்ததாகவும், தனக்கு அது போன்ற எதுவித இன்னல்களும் ஏற்படவில்லையென்றும், அவர் குறிப்பிட்டுள்ளார்.