சீனாவிடமிருந்து புதிய விமானங்கள் கொள்வனவு செய்யப்படுகின்றது.

இராணுவ பலத்தை அதிகரிக்கும் நடவடிக்கையாக சீனாவிடம் இருந்து 6 சியான் எம் ஏ 60 ரக விமானங்களை இலங்கை வாங்குகிறது. இந்த விமானங்கள் சீனாவின், தேசிய வான் தொழில்நுட்ப கூட்டுத்தாபனத்தில் இருந்து கொள்வனவு செய்யப்படவுள்ளதாக விமான போக்குவரத்து இணையத்தளம் தெரிவித்துள்ளது.

'பிளைட்குளோபல்' என்ற இணையத்தளத்தின் தகவல்படி, இந்த 6 விமானங்களும் கடன் அடிப்படையில் கொள்வனவு செய்யப்படவுள்ளன. இதில், 56 இருக்கைகளைக் கொண்ட இரண்டு விமானங்கள் இந்த வருடத்தில் இலங்கைக்கு தருவிக்கப்படவுள்ளன.ஏனையவை 2011 ம் ஆண்டில் இலங்கைக்கு கொண்டுவரப்படவுள்ளன.

எம் ஏ 60 விமானங்கள், 52 முதல் 60 பயணிகளை ஏற்றிச்செல்லக்கூடிய தன்மையை கொண்டிருக்கின்றன. இலங்கையில் தற்போது, போக்குவரத்துகளுக்காக ஏ.என் அன்டனோவ், லொக்ஹீட் மார்டின் சி- 130 கே எஸ் மற்றும் சீன தயாரிப்பான ஹார்பின் வை 12 ஆகிய விமானங்கள் பயன்படுத்தப்பட்டு வருகின்றன என்பது குறிப்பிடத்தக்கது.