Sunday, July 3, 2022

எமது அபிவிருத்தி திட்டங்களை கோத்தா நிறுத்தியதாலேயே மக்கள் பெருந்தெருக்களில்! சாடுகின்றார் 43 படையணியின் தலைவர்.

தனது அமைச்சினால் மேற்கொள்ளப்பட்டுவந்த பல்வேறு அபிவிருத்தி நடவடிக்கைகளை கோத்தபாய ராஜபக்ச தனது ஒற்றை கையொப்பத்தினூடாக நிறுத்தியுள்ளதாகவும் அவ்வாறு அந்த அபிவிருத்தி வேலைத்திட்டங்கள் நிறுத்தப்படாதிருந்திருந்தால் நாட்டு மக்கள் சிறந்த பேருந்து மற்றும் தொடருந்து சேவையை பெற்றுக்கொண்டிருப்பர் எனவும் எரிபொருளுக்காக வரிசையில் நிற்க வேண்டிய அவசியம் எற்பட்டிருக்காது எனவும் தெரிவித்துள்ளார் 43 படையணியின் தலைவர் சம்பிக்க ரணவக்க.

ஊடகவியலாளர் மாநாடொன்றில் மேற்கண்டவாறு கூறிய அவர் அங்கு பேசுகையில்:

வீழ்ந்து கிடக்கின்ற எம் தேசத்தையும் மக்களையும் தூக்கி நிறுத்தும் பொருட்டு நாம் அனைவரும் நான்கு விடயங்கள் தொடர்பில் ஒருமித்த கூட்டணியாக ஒரு தளத்தில் இணைந்து செயற்படவேண்டிய காலத்தின் கட்டாயத்தை நாம் சிபார்சு செய்கின்றோம்.

முதலாவதாக, தற்போது நீதி அமைச்சரால் சமர்ப்பிக்கப்பட்டுள்ள 22ம் அரசியல் யாப்பு திருத்தத்தை காலதாமதமின்றி நிறைவேற்றியாக வேண்டும்.

இந்த திருத்தம் நாங்கள் எதிர்பார்த்த திருத்தச்சட்டமாக அற்றதாகவும் கோத்தபாய ராஜபக்சவுக்கு பல்வேறு அதிகாரங்களை வழங்குவதாக அமைகின்ற திருத்தமாகவும் இருந்தாலும் , இது தொடர்பாக பேச்சுவார்த்தைகளை பாராளுமன்றில் நடாத்தி, பொருத்தமான திருத்தங்களை செய்து, ஜனாதிபதிக்கும் பாராளுமன்றுக்கும் இருக்கின்ற அதிகார போட்டிகளை நிவர்த்தி செய்து சுயாதீன ஆணைக்குழுக்களுக்கு அதிகாரங்களை வழங்கி, பசில் ராஜபக்ச மேற்கொள்ளுகின்ற சூட்சிகளை தோற்கடித்து நாட்டுமக்களை காக்கின்ற நடவடிக்கைகளுக்கு ஸ்ரீ லங்கா பொதுஜன பெரமுனவின் பாராளுமன்ற உறுப்பினர்களும் எம்முடன் இணையவேண்டுமென நாம் அழைப்பு விடுக்கின்றோம்.

கோத்தபாய ராஜபக்சவின் ஆட்சி இருக்கும்வரை வெளிநாட்டு முதலீட்டாளர்களின் உதவிகள் எமக்கு கிடைக்கப்போவதில்லை, ஆகக்குறைந்தது வெளிநாடுகளில் தங்கியிருக்கின்ற இலங்கையர்களின் உதவிகூட இந்த நாட்டுக்கு கிடைக்கப்போவதில்லை. சர்வதேச நாணய நிதியத்திடமிருந்து கிடைக்கப்பெறும் என்று நம்பிய உதவிகளுக்கான நம்பிக்கை இழந்து செல்கின்றது. கடந்த ஜூன் மாதம் 30ம் திகதி கையொப்பமாவதற்கு ஏற்பாடாகியிருந்த உழியர்கள் மட்ட ஒப்பந்தம் பிற்போடப்பட்டுள்ளது. இது தொடர்ந்தும் பிற்போடப்படுவதற்கான அறிகுறிகளே அதிகமாக தென்படுகின்றது. எங்களுக்கு கடன் வழங்கியுள்ளவர்கள் எமக்கு எதிராக வழக்கு தொடுத்துள்ளனர். மேலும் பலர் எமக்கெதிரான கடுமையான நடவடிக்கைகளை மேற்கொள்ள தயாராகி வருகின்றனர்.

நந்தசேன கோத்தபாய ராஜபக்சவாகிய நீர் உமது பொறாமை காராணமாக எமது அமைச்சினால் ஆரம்பிக்கப்பட்ட பல்வேறு அபிவிருத்தி திட்டங்களை ஒற்றைக் கையொப்பத்தினூடாக நிறுத்தியுள்ளீர். அவ்வாறு நீர் செயற்படாது இருந்திருந்தால் இன்று நாட்டு மக்களுக்கு சிறந்ததோர் பேருந்து சேவையும் தொடருந்து சேவையும் கிடைத்திருக்கும், உமது தான்தோன்றித்தனமான தூரநோக்கற்ற சுயநலச் செயற்பாட்டினால் நாம் இன்று எத்தனையோ நட்பு நாடுகளைக்கூட பகைத்து நிற்கின்றோம்.

இரண்டாவது, சர்வ கட்சி அரசாங்கம் ஒன்றை அமைப்பது இன்றியமையாததாகின்றது. சர்வ கட்சி அரசாங்கம் என்பது சலூன்கடையில் உள்ளவர்களை கொண்டுவந்து அரசமைப்பது அல்ல. பாராளுமன்றில் இருக்கின்ற கட்சிகளின் தலைவர்கள் இணைந்து நாட்டிற்கான கொள்கைளை வகுக்கின்ற சபையொன்று உருவாக்கப்படவேண்டும்.

பாராளுமன்ற உறுப்பினர்கள் 224 பேரையும் அமைச்சுக்களுடன் இணைக்கவேண்டும். அவர்களுக்கு அமைச்சின் செயற்பாடுகளில் பொறுப்புகள் வழங்கப்படுவதுடன் அமைச்சு குழுவாக செயற்படும் பொருட்டு அக்குழுவின் தலைவராக அமைச்சர் நியமிக்கப்படவேண்டும்.

இந்த நாட்டிலிருக்கின்ற பல நிறுவனங்களுக்கும் அந்தந்த துறைசார் நிபுணர்களை தலைவர்களாகவும் நிர்வாகிகளாகவும் நியமிக்கவேண்டும். அவ்வாறு அல்லாது அரசியல்வாதிகளின் எடுபிடிகள் நியமிக்கப்படும்போது இந்நாட்டின் ஊழலை ஒருபோதும் நிறுத்த முடியாது. இந்தநிலை தொடருமானால் நாம் சர்தேச சமூகத்தின் நம்பிக்கையையோ அன்றில் நாட்டு மக்களின் நம்பிக்கையையோ வென்றெடுக்க முடியாது.

மூன்றாவதாக, இன்றிருக்கின்ற நிலைமைகளிலிருந்து மீழும்பொருட்டு இடைக்கால பொது வேலைத்திட்டமொன்றை உருவாக்கி கொள்ளவேண்டும். 6 மாத காலத்திற்கோ அன்றில் மகா சங்கத்தினர் சிபார்சு மேற்கொண்டிருப்பதுபோல் 18 மாத காலத்திற்கான பொது வேலைத்திட்டமொன்றை உருவாக்கிக்கொள்ளவேண்டும். இந்த வேலைத்திட்டத்திற்கான அனுமதியை இந்நாட்டிலிருக்கின்ற உழைக்கும் மக்களிடமிருந்தும் வர்த்தகர்களிடமிருந்தும் பாராளுமன்றின் அனுசரணையுடன் 2 வார காலங்களுள் பெற்றுக்கொள்ளவேண்டும்.

நான்காவதும் மிக முக்கியமானதும் யாதெனில் கோத்தபாய ராஜபக்ச நாட்டின் ஜனாதிபதி பதவியை இராஜனாமா செய்யவேண்டும். அவர் அதனை மேற்கொண்டு 24 மணி நேரங்களுள் பொருத்தமான ஒருவரை நியமிக்கும் சந்தர்ப்பத்தை பாராளுமன்றுக்கு வழங்கவேண்டும்.

எனவே
1. 22 அரசியல் யாப்பு திருத்தத்தை நிறைவேற்றுதல்
2. சர்வ கட்சி அரசாங்கம் ஒன்றை நிறுவுதல்
3. பொது வேலைத்திட்டமொன்றை ஏற்படுத்திக்கொள்ளல்
4. கோத்தபாய ராஜபக்ச இராஜனாமா செய்தல்


என்ற நான்கு நிபந்தனைகளும் இன்று நாட்டுக்கு அத்தியாவசியமாகின்றது. இந்த நிபந்தனைகள் நிறைவேற்றப்படாவிடத்து இந்த நாட்டில் அரசியல் மற்றும் சமூகப்பிளவுகள் ஏற்பட்டு நாடு இரத்த வெள்ளத்தில் மூழ்குவதற்கான சந்தர்ப்பங்கள் காணப்படுவதாக எச்சரித்துள்ளார் கொழும்பு மாவட்ட பாராளுமன்ற உறுப்பினரும் 43 படையணியின் தலைவருமான சம்பிக்க ரணவக்க.



Read more...

Sunday, June 26, 2022

அமெரிக்க பிரஜாவுரிமையை கைவிட தயாராகுறார் பசில் ராஜபக்ச.

இலங்கை அரசியலில் இன்று பெரிதும் பேசப்படும் நபரான பசில் ராஜபக்ச அவரது அமெரிக்க பிரஜாவுரிமையை கைவிட்டு. இலங்கை பிரஜாவுரிமையை மாத்திரம் வைத்துக்கொள்ள முடிவு செய்துள்ளதாக பொதுஜன பெரமுன வரட்டாரங்களிலிருந்து அறியமுடிகின்றது.

நிறைவேற்றப்படவுள்ள 21ம் அரசியல்யாப்பு திருத்தத்தில் இலங்கை பிரஜாவுரிமை தவிர்ந்த பிறநாடொன்றின் பிரஜாவுரிமையை கொண்டுள்ளவர்களுக்கு இலங்கையில் அரசியலில் ஈடுபடமுடியாது என்ற தடை விதிக்கப்படுகின்றது. 19ம் திருத்தச் சட்டத்தின் ஊடாக கொண்டுவரப்பட்டிருந்த இந்த தடை 20 ம் திருத்தத்தினூடாக நீக்கப்பட்ட நிலையில் தேசியப்பட்டியல் ஊடாக பாராளுமன்று நுழைந்த பசில் ராஜபக்ச 21 ன் ஊடாக மீண்டும் தடை கொண்டுவரப்பட்டால் அரசியலில் ஈடுபட முடியாது என்பதை கருத்தில் கொண்டு தனது அமெரிக்க பிராஜாவுரிமையை முற்றாக கைவிட முடிவு செய்துள்ளதாகவும் தனது முடிவை கட்சியின் மூத்த உறுப்பினர்களுக்கு தெரியப்படுத்தியுள்ளதாகவும் தெரியவருகின்றது.

21 ம் திருத்தத்தின் ஊடாக பிறநாடொன்றில் பிரஜாவுரிமையை கொண்டுள்ளவர்களுக்கு அரசியலில் ஈடுபடமுடியாது என்ற நிபந்தனை நிறைவேற்றப்பட்டால் பாராளுமன்ற ஆசனத்தை இழக்க நேரிடும் என்பதை உணர்ந்த பசில் ராஜபக்ச முன்கூட்டியே தனது பாராளுமன்ற உறுப்பினர் பதவியை இராஜினாமா செய்திருந்தார். அவ்வாறு இராஜனாமா செய்த அவர் பொதுஜன பெரமுனவின் தேசிய அமைப்பாளராக கட்சியை மீள் கட்டுமானம் செய்வதில் தீவிரமாக செயற்பட்டுவருவதை அவதானிக்க முடிகின்றது.

21 ம் திருத்தச்சட்டம் நிறைவேற்றப்படுவதை தடுக்கும் பொருட்டு பொதுஜன பெரமுனவின் தன் சார்பு பாராளுமன்ற உறுப்பினர்களை பசில் ராஜபக்ச திரட்டிவருவதாக விமர்சனங்கள் எழுந்திருந்த நிலையில் அவர் அமெரிக்க பிரஜவுரிமையை கைவிட முயற்சிக்கின்றார் என்ற செய்தி எதை கூறுகின்றது?

முதலாவது திருத்தச்சட்டம் நிறைவேற்றப்படுவதை தடுப்பதற்கான 76 ஆசனங்களை பசில் ராஜபக்சவால் திரட்ட முடியவில்லை என்று கூறலாம்.
இரண்டாவது மக்களின் அபிலாஷைகளின் பிரகாரம் 21 நிறைவேற வழிவிட்டு அதற்கேற்றாற்போல் தனது பிரஜாவுரிமையை கைவிட்டு மீண்டும் அரசிலில் ஈடுபட முயற்சிக்கலாம்.
மேற்கூறிய இரண்டும் இல்லையாயின் அமெரிக்காவில் தொடரப்பட்டுள்ள வழக்கு ஒன்றில் ராஜபக்சக்கள் நாட்டின் பணத்தை கொள்ளையடித்துள்ளனர் என்றும் அவர்கள் அப்பணத்தில் பிற நாடுகளில் சொத்துக்களை வைத்துள்ளனர் என்றும் தெரிவிக்கப்பட்டுள்ள நிலையில், தொடர்ந்தும் அமெரிக்கப்பிரஜையாவிருந்தால் பொறுப்புக்கூறவேண்டிவரும் என அமெரிக்க பிரஜாவுரிமையை கைவிட முயற்சிக்கலாம்.



Read more...

Wednesday, June 22, 2022

பிச்சைப் பிரதமர் எங்களுக்கு வேண்டாம்! ரணில் விக்ரமசிங்கவின் இல்லைத்தை சுற்றிவளைத்துள்ளார் ஹிருணிகா. நேரடி ஒளிபரப்பு

பிரதமர் ரணில் விக்ரமசிங்கவின் இல்லம் ஹிருணிகா பிறேமச்சந்திர தலைமையிலான பெண்களணியினால் சுற்றிவளைக்கப்பட்டுள்ளது. இல்லத்தை சுற்றிவளைத்துள்ள அணியினர் „புண்ணியத்தில் பிரதமரானாவர் எங்களுக்கு வேண்டாம்' என உரக்க முழக்கமிடுகின்றனர்.

ஜனாதிபதி கோத்தபாயவிற்கு எதிராக இன்று மேற்கொள்ளப்படும் போராட்டங்களுக்கு பிள்ளையார் சுழி ஹிருணிக்காவினாலேயே போடப்பட்டுது என்பது யாவரும் அறிந்தது. அவர் கோத்தபாயவின் மிரிஹானையிலுள்ள இல்லைத்தை இவ்வாறு சுற்றிவளைத்து போராட்டத்தை ஆரம்பித்து வைத்தவர். இன்று பிரதமருக்கு எதிரான ஆர்ப்பாட்டமொன்றை ஆரம்பித்துள்ளார்.

ஹிருணிகா பிறேமச்சந்திர பிரதான எதிர்கட்சியான தேசிய மக்கள் கட்சியின் உறுப்பினரும் முன்னணிச் செயற்பாட்டாளருமாவார்.

ஆர்ப்பாட்டம் நேரலையில்..





Read more...

Monday, June 20, 2022

மருந்துதட்டுப்பாட்டுக்கு அரசியல்வாதிகள் மாத்திரமல்ல அரச அதிகாரிகளும் காரணம். டாக்டர் ஐ.எல்.எம். றிபாஸ்

இப்போதைய நாட்டின் நிலையில் மருந்துத்தட்டுப்பாடு அரச வைத்தியசாலைகளுக்கு மட்டுமல்ல பாமசிகளுக்கும் இருக்கிறது. பாமசிகளில் இல்லாத நிறைய மருந்துகள் அரச வைத்தியசாலைகளிலும், களஞ்சியசாலைகளிலும் இருக்கிறது. எல்லா விடயங்களுக்கும் நாம் அரசியல்வாதிகளை குற்றம் சாட்டுகிறோம். ஆனால் அரச அதிகாரிகளே இந்த விடயங்களுக்கு பெரும்பாலும் பொறுப்பானவர்கள் என்பது எனது கருத்து. அண்மையில் வெளியான அறிக்கையின் படி 6692 மில்லியன் ரூபாய் பெறுமதியான மருந்துகள் களஞ்சியங்களில் பாவனைக்கு தகுதியற்றதாக அடையாளம் கண்டு எப்படி அவற்றை அழித்துவிடுவது என்பது பற்றி தெரியாமல் இருக்கிறது. எமது பகுதியில் (கல்முனை பிராந்தியத்தில்) மட்டும் தகுதி இழந்த 12.8 மில்லியன் பெறுமதியான மருந்துகள் இருப்பதுடன் காலாவதியான மருந்துகளும் 40 மில்லியன் ரூபாய் அளவில் இருக்கிறது. யார் இதற்கு பொறுப்பு கூறுவது. அரசாங்கத்தை மட்டும் குறைகூறிக்கொண்டிருந்தால் இதற்கு வகை சொல்வது யார்? இது யாரின் வரிப்பணம்? இந்த வீண்விரயத்திற்கு யார் பொறுப்பு கூறுவது என கல்முனை பிராந்திய சுகாதார சேவைகள் பணிப்பாளர் டாக்டர் ஐ.எல்.எம். றிபாஸ் கேள்வியெழுப்பினார்.

பாமசி உரிமையாளர்களுக்கு கல்முனை சுகாதார சேவைகள் பணிமனையில் இடம்பெற்ற செயலமர்வில் கலந்துகொண்டு உரையாற்றிய அவர் தொடர்ந்தும் அங்கு கருத்து தெரிவிக்கையில், இந்த மருந்து வீண்விரயங்களும், காலாவதி பிரச்சினைகளும், தர நிர்ணய பிரச்சினைகளுக்கு தனியார் பாமசிகளுக்கு அதிகமாக ஏன் வருவதில்லை? ஏனென்றால் அது சொந்தப்பணம் பாதுகாக்க வேண்டும் என்ற பொறுப்புணர்வு இருப்பதே காரணம். இந்த நாட்டில் உள்ள பிரச்சினைகளுக்கு காரணம் அரசியல்வாதிகள் மட்டுமல்ல. அரசாங்கம் என்பது அரசியல்வாதிகள் கிடையாது. அதிகாரிகள் தான் அரசாங்கம். இந்த நாட்டின் சீரழிவுக்கு நாமும் பொறுப்பு என்பதை நாம் உணர வேண்டும்.

நாம் பொறுப்புணர்வில்லாமல் செய்த ஒவ்வொரு செயலும் இந்த நாட்டின் சீரழிவுக்கு காரணமாக அமைந்துள்ளது. மாற்றம் நம்மிலிருந்து, நமது வீட்டிலிருந்து வர வேண்டும். நாம் இங்கு வீணாக்கும் ஒவ்வொரு சொட்டு தண்ணீரும் உலகில் எங்கோ ஒரு மூலையில் யாரோ தாகத்துடன் இருப்பதை உறுதிப்படுத்துகிறோம் என்பதை மறந்து விட முடியாது. இவற்றையெல்லாம் சீரமைத்தல் தொடர்பில் சிந்திக்க எமது விஞ்ஞானிகளோ, பல்கலைக்கழகங்களோ, புத்திஜீவிகளோ தயாரில்லை. நாம் மாற்றுவழிகள் தொடர்பில் சிந்திப்பதில்லை. நமது நிலைப்பாடு இவைகள் பற்றி யாரோ கூறும்வரை காத்திருக்க வேண்டியிருக்கிறது.

உலகில் ஆயுர்வேதம் பெரியளவில் பொருளாதாரத்தை குவிக்கும் துறையாக மாறியிருக்கிறது. நமது நாட்டில் கிழக்கில் சாதாரணமாக விளையும் ஆமணக்கு போன்ற எத்தனையோ வகையான மூலிகைகளை இந்தியாவிலிருந்து கிழங்கு மட்டுமே 500 மில்லியன் செலவழித்து இறக்குமதி செய்துகொண்டிருக்கிறோம். நிலவேம்பு இலை கிலோ 35000 ருபாய். ஆமணக்கு கிலோ 2500 ரூபாய், நெருஞ்சி கிலோ 690 ரூபாய்க்கு எமது அரசாங்கம் வாங்கிக்கொண்டிருக்கிறது. இப்படி முறையான திட்டமிடல்கள் இல்லாதமையினால் நாடு முழுவதிலும் பல ஆயிரம் கோடி ரூபாய்களை நாம் வீணடித்து கொண்டிருக்கிறோம். இவ்வளவு வீணடிப்புக்களை தாங்கிக்கொண்டும் எமது நாடு எப்படி செல்வசெழிப்பாக இருந்தது என்று எனக்கு ஆச்சரியமாக இருக்கிறது.

வாளியில் பெரிய ஓட்டையை போட்டுவிட்டு தண்ணி நிறைக்கும் விடயமாகவே நாட்டின் இன்றைய நிலை தெரிகிறது. மக்களின் கடின உழைப்பினால் இந்த நாடு கடந்த காலங்களில் தலைநிமிர்ந்து நின்றது. பாலைவனத்திலும், குளிரிலும் கஷ்டப்பட்ட ஒவ்வொரு இலங்கையரின் உழைப்பே எமது நாட்டின் கௌரவத்திற்கு காரணம். எமது பொறுப்பை நாம் உணர்ந்து நடக்க வேண்டும். சுகாதாரத்துறையில் மக்களுக்கு கிடைக்கவேண்டிய அதியுச்ச பயனை மக்களுக்கு வழங்கவே நாங்கள் அரச சம்பளம் பெற்ற அதிகாரிகளாக இருக்கிறோம். பல்வேறு தரப்புக்களுடனும் ஆரோக்கியமான கருத்தாடல்களை மேற்கொண்டு பொதுமக்களுக்கு அன்னியோன்னியமாக சேவையை வழங்கவே நாங்கள் தயாராக இருக்கிறோம். வீதி சமிக்கைகள் அமைக்கப்பட்டிருப்பது பயணத்திற்கு இடையூறு செய்வதற்கல்ல. மாறாக எல்லா பயணிகளும் பாதுகாப்பாகவும், சௌகரியமாகவும் வீதியில் பயணிக்கவே. வாகனப்போக்குவரத்து இல்லாத நள்ளிரவில் கூட நான் வீதி விளக்குகளை மீறி செல்வதில்லை. சட்டத்திட்டம் தொடர்பில் எனது தந்தை எனக்கு சரியாக வழிகாட்டியுள்ளார். தந்தை சொல்லை மதிப்பதில் நான் பெருமையடைகிறேன். நாம் செய்யும் தவறுகள், அதிகார தோரணைகள் இன்னுமொருவரை பாதித்துவிடக்கூடாது. நாம் செய்யும் தவறுகளுக்கு வேறு யாரோவெல்லாம் பாதிப்பை அனுபவிப்பது, மரணிப்பது தர்மமல்ல.

சட்டம் எல்லோருக்கும் பொதுவானது. எமது நாட்டின் சட்டங்கள் காலனித்துவ காலத்தில் உருவாக்கப்பட்டவை. அந்த சட்டங்கள் தற்காலத்திற்கு ஏற்றாற்போல மாற்றப்படாமையினால் காலாவதியான சட்டங்கள் கூட எம்மை கட்டுப்படுத்துகின்றன. அந்த சட்டங்கள் மாற்றப்பட வேண்டிய தேவை இருக்கிறது. நீதிமன்றத்திலும், பொலிஸிலும், அதிகாரத்திலும் அந்த சட்டங்கள் வழமையாக இருந்துவருகிறது. அதனால் அதனை மீறுகின்றவர்களுக்கு தண்டனை பெற்றுக்கொடுக்கவேண்டிய கடமை அதிகாரிகளுக்கு இருக்கிறது. அதனால் தான் சில நேரங்களில் அதிகாரிகள் கடினமாக நடந்துகொள்ளவேண்டி இருக்கிறது.- என்றார்.



Read more...

Sunday, June 19, 2022

ராஜீவ் காந்தி கொலையில் புலிகளின் தொடர்பு : முடிச்சி எவ்வாறு அவிழ்ந்தது? தொடர் 02

ஹரிபாபு : இவன் ஒரு ப்ரி லாஞ்சர் கேமிராமேன் யாராவது பத்திரிக்கையில் கேமிராமேன் கிடைக்கவில்லை என்றால் கூலிக்கு ஹரிபாபுவை கூட்டி செல்வது உண்டு. அதனால் பல பத்திரிகையாளருக்கு ஹரிபாபு அறிமுகம் உண்டு . ராஜிவ் படுகொலை நடந்த அந்த பொதுகூட்டத்தில் பலர் சிவராசனோடு ஹரிபாபுவை பார்த்து உள்ளனர். அப்படி பார்த்த பத்திரிகையாளர் சாட்சியம் பற்றி பின்னர் சொல்கிறேன்.

சி.பி.ஐ ஹரிபாபு வீட்டில் சோதனை செய்கிறார்கள். ஆனால் எந்த தடயமும் அந்த சின்ன கூரை வீட்டில் கிடைக்க வில்லை. ஹரிபாபு புகைப்படமோ கேமிரா ஸ்டாண்ட் என அவர் சம்பந்தப்பட்ட எதுவும் அங்கே இல்லை. அவர் அம்மா அப்பாவிடமும் எந்த உருப்படியான தகவலும் கிடைக்கவில்லை அங்கிருந்து வெளியேறினாலும் அந்த வீட்டை கண்கானிக்க ரகசியமாக காவலரை நியமித்தனர். கண்கானித்த காவலர்கள் அந்த வீட்டின் பின்னே வேறு ஒரு வீடு அவர்களுக்கு இருப்பதையும் அது பூட்டி இருப்பதை கண்டுபிடித்தனர். இது பற்றி அவர்கள் துப்பு தந்ததும் உடனடியாக அந்த வீட்டை சோதனயிட்டனர் . அங்கே கட்டு கட்டாக விடுதலை புலிகளுக்கு ஆதரவான நோட்டீஸ், புத்தகம் கிடைத்தது அத்துடன் முக்கியனாமன இரண்டு கடிதமும் கிடைத்தது.


ஹரிபாபு வீட்டில் புலிகளின் புத்தகம் நோட்டிஸ் கைப்பற்றும் வரை உளவுதுறை இதில் விடுதலை புலிகளுக்கு தொடர் இல்லை என்றே உறுதியாக நம்பியது அதற்கு காரணம். கிட்டு ராஜிவ் காந்தி கொலை நடைபெற்ற தினத்துக்கு மறுநாள், லண்டனில் இருந்த விடுதலைப் புலிகள் சர்வதேசச் செயலகத் தலைவர் சதாசிவம் கிருஷ்ணகுமார் (கிட்டு), ”இதில் தங்கள் இயக்கத்துக்குத் தொடர்பு இல்லை” என்று அறிவித்தார்.

கிட்டு கூறிய தகவல் ஊடகங்களில் வெளியாகும் முன்னர், இந்திய உளவுத்துறை றோவுக்கு, கிட்டுவால் நேரில் கூறப்பட்டிருந்தது. அதை றோவும் நம்பியது. கிட்டுவின் கூற்றை றோ நம்புவதற்கு ஒரு முக்கிய காரணமும் இருந்தது. அதுதான், வில்லங்கமானது!

இந்த இடத்தில் மற்றொரு உண்மையையும் கூறிவிடலாம். இந்திய உளவுத்துறைக்கு ஏற்பட்ட மகத்தான சறுக்கல் என்பதால், நாம் கூறப்போகும் விஷயம் பல வருடங்களாகவே அடக்கி வாசிக்கப்பட்டது. ராஜிவ் கொல்லப்படுவதற்கு முன்பே, விடுதலைப் புலிகள் அமைப்பில் யாழ்ப்பாணத்தில் மிகப் பிரபலமாக இருந்த தளபதி கிட்டு, அவரது பிரபல்யம் உச்சத்தில் இருந்தபோது, அவர்மீது, யாழ்ப்பாணத்தில் வைத்து குண்டுவீச்சு ஒன்று நடைபெற்றது. (ராணுவமோ, வெளி ஆட்களோ செய்யவில்லை. புலிகள் இயக்கத்தின் உள் விவகாரம் அது. அதைப்பற்றி இங்கே வேண்டாம்)

அதில் காயமடைந்த கிட்டு தனது ஒரு காலை இழக்கும் நிலை ஏற்பட்டது. அதன்பின் மருத்துவச் சிகிச்சைக்காக அவர் சென்ற இடம், தமிழகம்! தமிழகத்தில் கிட்டு தங்கியிருந்த காலத்தில், அவருடன் தொடர்புகளை ஏற்படுத்திக் கொண்டது இந்திய உளவு அமைப்பு றோ. ஒரு கட்டத்தில், கிட்டுவை தமது ஆளாகவே நினைத்துக் கொண்டது றோ. இதில்தான் ஏற்பட்டது இந்திய உளவுத்துறையின் மகத்தான சறுக்கல். கிட்டுவை தமது நிரந்தர இன்போர்மராக வேலையில் சேர்த்துக் கொண்ட றோ, அவருக்கு மாதா மாதம் சம்பளமும் வழங்கியது.


கிட்டுவை லண்டனுக்கு அனுப்புவதற்கு விடுதலைப் புலிகள் இயக்கம் முடிவு செய்தபோது, றோவுக்கும் அதில் சந்தோஷமே. புலிகளின் வெளிநாட்டு டீலிங்குகள் பற்றிய முழு விபரங்களும் கிட்டு மூலமாகத் தமக்கு தெரியவரும் என்று நினைத்துக் கொண்டது இந்திய உளவுத்துறை. கிட்டு லண்டனில் இருந்தபோதும், றோவினால் மாதாமாதம் வழங்கப்பட்ட சம்பளம் அவருக்கு போய்க் கொண்டு இருந்தது. இப்படியான நிலையில்தான், ராஜீவ் காந்தி கொலை நடைபெற்றது!

இந்திய உளவுத்துறை றோ உடனடியாகவே, தமது இன்போர்மர் கிட்டுவைத் தொடர்பு கொண்டது. ராஜிவ் காந்தி கொலையில் புலிகள் தொடர்பு இருக்கிறதா என்று கேட்டார் றோவில் கிட்டுவுக்கான ஹான்டிலர். தான் தகவல் அறிந்து சொல்வதாக கூறிய கிட்டு, அடுத்த சில மணி நேரத்தின் பின், றோவின் அதிகாரியை போனில் தொடர்பு கொண்டார். “நான் விசாரித்து விட்டேன். இதில் புலிகளுக்கு எந்த தொடர்பும் கிடையாது” என்றார் கிட்டு. “இது மிகவும் முக்கியமான விஷயம். மீண்டும் ஒருமுறை உங்கள் தொடர்புகளிடம் நன்றாக விசாரியுங்கள். ராஜிவ் கொலையை, இந்தியாவில் தங்கியுள்ள புலிகளின் உறுப்பினர்கள் யாராவது செய்திருப்பார்களா என்று கேட்டுப் பாருங்கள்” என்று வற்புறுத்தினார் றோ அதிகாரி. அதற்கு கிட்டு கூறிய பதில்தான் கிளாசிக்!

“நான் விசாரித்ததே புலிகளின் தலைமையிடம்தான் (பிரபாகரன்). அவரது அனுமதி இல்லாமல் இப்படியான பெரிய காரியம் ஏதும் புலிகள் இயக்கத்தில் நடக்க முடியாது. இதில் புலிகளின் தொடர்பு இல்லை என்று தலைவர் அடித்துக் கூறுகின்றார் . உண்மையைச் சொல்லப் போனால், ராஜிவ் காந்தி கொல்லப்பட்ட விஷயம் கேள்விப்பட்டு அவரே அதிர்ந்து போய் இருக்கிறார்” என்பதே கிட்டு கூறிய பதில்!

கிட்டுவின் பதிலுடன், ராஜிவ் கொலையை புலிகள் செய்யவில்லை என்று கன்வின்ஸ் ஆகியது றோ. சி.பி.ஐ.யின் விசேட புலனாய்வுக்குழு விசாரணையைத் தொடங்கியபோது, இந்தியாவின் வெளிநாட்டு விவகாரங்களைக் கவனிக்கும் உளவுத்துறை என்ற வகையில் றோவிடமும் கருத்து கேட்கப்பட்டது. அதற்கு றோ கூறிய பதில், “இந்தக் கொலையை புலிகள் செய்யவில்லை” என்பதே!

கிட்டு தம்மை ஏமாற்றிய வடுவை நீண்ட காலம் மனதில் வைத்திருந்த றோ, பின்னாட்களில் என்ன செய்தது? கிட்டு கப்பல் மூலம் வன்னி செல்கையில் இந்து சமுத்திரத்தில் வைத்து இந்திய கடற்படையால் தடுக்கப்பட்டார். நடுக்கடலில் நடைபெற்ற சில பேச்சுவார்த்தைகளின்பின், கிட்டு சக்தி வாய்ந்த குண்டை வெடிக்க வைத்து, கப்பலையும் அழித்து, தானும் தற்கொலை செய்து கொண்ட சம்பவத்தில், றோவும் முக்கிய பங்கு வகித்தது.

நாம் மீண்டும் ஹரிபாபு விடயத்துக்கு வருவோம்
ஹரிபாபு வீட்டில் கைபற்றபட்ட கடிதத்தில் ஒன்று அவர் காதலி சுந்தரி எழுதியது. அதில் அவர் ஹரிபாபு தவறான நபர்களுடன் பழகுவதாகவும் , கொஞ்சம் நாட்களில் முக்கிய காரியம் ஒன்று முடித்ததும் யாழ்பானத்தில் போயி தங்கிடலாம் என ஹரிபாபு கூப்பிடுவதாகவும் இதில் தனக்கு உடன்பாடு இல்லை என எழுதி உள்ளார்.

இரண்டாம் கடிதம் தாஸ் என்னும் முருகன் எழுதியது அதில் தான் கொடுத்து அனுப்பும் பனத்தை பாக்கியநாதனிடம் ( நளினியின் தம்பி) கொடுத்து விடும்படியும் அறிவு ( பேரரிவாளன் ) வந்து வாங்கி கொள்வார் எனவும் எழுதி இருந்தது. முதல் கடித்ததின்படி ஹரிபாபுக்கு ராஜிவ் கொலை நடக்க போவது தெரிந்தே தான் ஸ்ரீ பெரும்புதூர் கூட்டதில் கலந்து கொண்டு இருக்கிறார் என யூகத்துக்கு வர இயலும்.

அப்படி இருக்க அவர் எப்படி குண்டு வெடிப்பில் இறந்தார்? என்ற கேள்வி எழும்.

இதற்க்கான விடையை அடுத்த பதிவில் பார்ப்போம்..

தொடரும் ......



Read more...

Saturday, June 18, 2022

டக்ளசின் அதிகார துஷ்பிரயோக, கொள்ளைப்பட்டியல். பதிலளிப்பாரா சிரேஷ்ட அமைச்சர்?

நாட்டில் இன்று ஏற்பட்டுள்ள பொருளாதார நெருக்கடிக்கு ஊழல்களை புரிந்துள்ள அரசியல்வாதிகளும் அவர்களுக்கு துணைபோன அரச ஊழியர்களுமே பொறுப்புக்கூறவேண்டியவர்கள் என்ற காரணத்தினால் பாராளுமன்றை பிரதிநிதித்துவம் செய்கின்ற 225 பேரும் நிராகரிக்கப்படவேண்டியவர்கள் என மக்கள் ஒருமித்த குரலில் தெரிவிக்கின்றனர். இந்நிலையில் ஈபிடிபி எனப்படுகின்ற ஈழ மக்கள் ஜனநாயகக் கட்சியின் தலைவரும் அமைச்சருமான டக்ளஸ் தேவானந்தா, அரசியலினுள் பிரவேசித்ததிலிருந்து மேற்கொண்டுள்ளதாக கூறப்படுகின்ற மோசடிகளை 'இனமொன்றின் குரல்' எனப்படும் முகநூல்பக்கம் பட்டியலிட்டுள்ளது.

இப்பட்டியலில் குறிப்பிடப்பட்டுள்ள குற்றச்சாட்டுக்களை வெறும் அவதூறுப்பிரச்சாரம் என்ற ஒற்றைச்சொல் பதிலுடன் கடந்து செல்லாது, விளக்கமான பதிலினை டக்ளஸ் தேவானந்தா மக்களுக்கு வழங்குவார் என்ற நம்பிக்கையில், பட்டியலை இலங்கைநெட் மிகுந்த எதிர்பார்ப்புடன் மீள்பிரசுரம் செய்கின்றது.

டக்ளஸ் புரிந்துள்ளதாக வெளிவந்துள்ள அதிகார துஷ்பிரயோக , கொள்ளைப்பட்டியல்:

1. யாழ்ப்பாணத்தில் சட்டவிரோத மணல் வியாபாரம் மூலம் சம்பாதித்த நான்காயிரம் மில்லியன் ரூபாவிற்கும் அதிகமான பணத்தை அரசாங்கத்திடம் மீள செலுத்த வேண்டும்.

2. பசில் ராஜபக்சே அவர்களின் முதலீட்டுடன் யாழ்ப்பாண மற்றும் கொழும்புக்கு இடையில் நடத்தபட்ட சொகுசு பஸ் வண்டி சேவையில் உழைத்த கோடிக்கணக்கான பணத்தை திறைசேரியிடம் வழங்க வேண்டும்.

3. யாழ்ப்பாண ஈ பி டி பி அலுவலகத்திற்கான முழு மின்சார நிலுவை கட்டணமான 97 லட்சத்து 16 ஆயிரத்து 120 ரூபா 40 சதம் பணத்தை உடனடியாக மீள செலுத்த வேண்டும்.

4. டக்ளஸ் தேவானந்தாவுக்கு கொழும்பு-5, பார்க் வீதியிலும் கொழும்பு-4, லேயாஸ் வீதியிலும் சொந்தமாக இருந்த வீடுகளுக்கான தண்ணீர் கட்டணம் 1 கோடியே 19 இலட்சத்து 88 ஆயிரத்து 267 ரூபா 95 சதம் மீள செலுத்த வேண்டும்.

5. மாநகர சபைகள் கட்டளை சட்டத்திற்கும் நகர அபிவிருத்தி அதிகார சபை சட்ட விதிகளுக்கும் முரணாக கஸ்தூரியார் வீதியில் கட்டடப்பட்ட கட்டடத்தில் திருடிய கோடிக்கணக்கான பணத்தை அரச திறைசேரிக்கு மீள செலுத்த வேண்டும்.

6. யாழ்ப்பாண நகரில் ஈ பி டி பி அமைப்பு தங்களுக்கு சொந்தமான DD தொலைக்காட்சி நிறுவனத்தையும் மகேஸ்வரி நிதிய அலுவலகத்தையும் சட்டவிரோதமாக நடத்தியன் மூலம் ஏற்பட்ட இழப்பை அரசாங்கத்திற்கு மீள செலுத்த வேண்டும்.

7. யாழ்ப்பாண மாநகரசபையின் அங்கீகரிக்கப்பட்ட ஆளணிக்கு மேலதிகமாக 430 பேரை நியமனம் செய்து மாதம் தோறும் 6 மில்லியன் ரூபா பணத்தை, அதாவது ஆண்டுக்கு 72 மில்லியன் ரூபா பணத்தை மாநகர சபைக்கு மீள செலுத்த வேண்டும்.

8. சட்டவிரோத மேற்கொள்ளப்பட்ட தொண்டராசிரியர் நியமனங்கள் , சுகாதார ஊழியர் நியமனங்கள் போன்ற அரச நியமனங்களால் ஏற்பட்ட கோடிக்கணக்கான அரச நிதி இழப்பை திறைசேரிக்கு மீள வழங்க வேண்டும்.

9. அதிகாரத்தில் இருந்தபோது அபகரித்த பிரதேச மற்றும் நகர சபைக்களுக்கு சொந்தமான வாகனங்களை மீள அரசாங்கத்திடம் ஒப்படைக்க வேண்டும்.

10. அரச படைகளின் உதவியுடன் பொதுமக்கள் மற்றும் குழந்தைகளை கடத்தி கொலைசெய்து வசூலித்த கப்ப பணம் மீள பாதிக்கப்பட்டவர்களிடம் வழங்கப்பட வேண்டும்.

11. வடக்கு கடலில் இழுவை மீன்பிடி தொழிலில் ஈடுபடும் மீனவர்கள் ஓவருவரிடமும் கப்பமாக பெறப்படும் 5,000 ரூபா பணம் மீள வழங்கப்பட வேண்டும்.

12. ஸ்ரீதர் திரையரங்கு உட்பட பொதுமக்களிடம் அபகரிக்கப்பட்ட தனியார் சொத்துக்கள் மற்றும் அதற்கான இழப்பீடுகள் உடனடியாக வழங்க வேண்டும்.

13. 1990 ஆம் ஆண்டு முதல் அப்பாவி பொதுமக்களை காட்டி கொடுப்பதற்காக அரச பாதுகாப்பு அமைச்சில் துணைப்படையாக செயல்பபட்டு சம்பளமாக பெற்ற கோடிக்கணக்கான பணத்தை உடனடியாக மீள செலுத்த வேண்டும்.

14. வீதி புனரமைப்பு உட்பட அரசின் அபிவிருத்தி திட்டங்களுக்கான ஒப்பந்தங்களை முறைகேடாக வழங்கியதன் ஊடாக அரசுக்கு இழப்பு ஏற்படுத்தப்பட்ட கோடிக்கணக்கான பணத்தை மீள வழங்க வேண்டும்.

15. கோவில் புனரமைப்பு என்கிற பெயரில் முறைகேடான காசோலை மோசடிகளில் ஈடுபட்டு உழைத்த பல கோடி பெறுமதியான அரச பணத்தை மீள செலுத்த வேண்டும்.

16. இது மாத்திரமின்றி தீவகத்தில் மாடு கடத்தல் தொடக்கம் இரும்பு வியாபாரம் வரை சகல சட்டவிரோத வியாபார முயற்சிகளில் உழைத்த பணத்தை அரசாங்கத்திற்கு வழங்க வேண்டும்.

Read more...

Friday, June 17, 2022

21A அவசரத்தேவையாம். சீரிய சிந்தனையுடையோரை ஒன்றிணையட்டாம்! 43ம் படையணியின் தலைவர் சம்பிக்க ரணவக்க

எந்தவொரு அர்த்தமுள்ள சமூக ஸ்திரத்தன்மையையும் பொருளாதார மீட்சியையும் அடைவதற்கு 21A என்பது அவசர தேவையாகவுள்ள முன்நிபந்தனையாகும். இதன் அடிப்படை தேவையை உணர்ந்து கொள்வதற்கு முழு அரசியற்பரப்பிலுமிருக்கின்ற சீரிய சிந்தனை கொண்ட பாராளுமன்ற உறுப்பினர்கள் அனைவரும் ஒன்றுதிரளவேண்டும் என அழைப்பு விடுத்துள்ளார் 43ம் படையணியின் தலைவரும் பாராளுமன்ற உறுப்பினருமான சம்பிக்க ரணவக்க.

நாடு பொருளாதார சிக்கலில் சிக்கித்தவிக்கும் தருணத்தில் தான் சார்ந்திருக்கும் எதிர்கட்சியான தேசிய மக்கள் சக்தி சரியான நேரத்தில் சரியான முடிவுகளை எடுக்கத்தவறியுள்ளது என்ற காரணத்தினால் கடந்த வாரம் எதிர்கட்சியில் சுயாதீனமாக பாராளுமன்றில் இயங்கப்போவதாக அறிவித்துள்ள பா.உ சம்பிக்க ரணவக்க ரிவிட்டர் ஊடாக இந்த அழைப்பை விடுத்துள்ளார்.

ஜாதிக்க ஹெல உறுமயவின் பிரதான செயற்பாட்டாளராகவிருந்த சம்பிக்க ரணவக்க அக்கட்சியிலிருந்து வெளியேறி 43ம் படையணி என்ற அரசியல் அமைப்பை தோற்றுவித்துள்ளார் என்பதும் அவ்வமைப்பில் பல்வேறு துறைகளையும் சேர்ந்த நிபுணர்கள் 'நம்பிக்கையோடு காத்திருப்போம், உயர்வோம் உயர்த்துவோம்' என்ற சுலோகத்தின் கீழ் ஒன்றிணைந்துள்ளனர் என்பது இங்கு குறிப்பிடத்தக்கதாகும்.



Read more...

Tuesday, June 14, 2022

மக்கள் பக்தியில் உயர்ந்த கோபுரம்! றொபேர்ட் ன் படுகொலையும் ஒரு கோழையின் குமுறலும்..

ஈழ மக்கள் புரட்சிகர விடுதலை முன்னணியின் - வரதர் அணி பிரதித்தலைவராகவும், யாழ் மாநகர சபையின் உறுப்பினராகவும் செயற்பட்டுக்கொண்டிருந்த தோழர் றொபேர்ட் என அழைக்கப்பட்ட தம்பிராஜா சுபத்திரன் இற்றைக்கு 19 வருடங்களுக்கு முன்னர் 2002 ம் ஆண்டு ஜூன் மாதம் 14ம் திகதி காலை 06.15 மணிக்கு புலிகளின் கொலைப்படைகளில் ஒன்றான சினைப்பர் பிரிவினரால் சுட்டுக்கொல்லப்பட்டிருந்தார்.

அன்னாரின் இறுதிச்சடங்கில்கூட பங்கு பற்ற முடியாது நின்ற தமிழ் கோழை என தன்னை அறிமுகம் செய்து கொள்ளும் நபர் ஒருவர் றொபேர்ட்டின் நினைவாக டெய்லி நியூஸ் பத்திரிகைக்கு எழுதிய மடல் ஒன்று மீண்டும் அவர் நினைவாக..

றொபேர்ட் இப்போது எம் முன் இல்லை. ஜூன் 14ம் திகதி காலை மொட்டை மாடியில் ஈ.பி.ஆர்.எல்.எப் வரதர் அணியைச் சேர்ந்த றொபேர்ட் எனப் பலராலும் அறியப்பட்ட சுபத்திரன் உடற் பயிற்சி செய்து கொண்டிருக்கையில் கொலையாளியால் சுட்டுக் கொல்லப்பட்டார்.

எமது நிறுவனத்துக்கு இராணுவ உதவி தேவைப்பட்டபோது றொபேர்ட் எனக்கு அறிமுகமானார். வடக்கு கிழக்கிலுள்ள மக்களுக்கு இவ்வாறான பல உதவிகளை ஈ.பி.டி.பி, ஈ.பி.ஆர்.எல்.எப் என்பவையே செய்யக்கூடியவையாக இருந்தன. செய்து கொண்டிருந்தன. அரசியலுக்கப்பால் மேற்படி கட்சிகளின் உதவிகளையும் நன்மைகளையும் தமிழ் மக்கள் பெற்றிருக்கின்றனர். ஆனால் பின்னர் அவர்கள் அதனை மறந்து மௌனிகளாகிவிடுகின்றனர்.

தனது சமூகத்தின் மீது அக்கறை கொண்ட ஒரு இலட்சியவாதியாகத்தான் றொபேர்ட்டை நாம் கண்டோம். எனக்கு உதவுவதற்காக அவர் செயற்பட்டவிதம் அவர் எவ்வளவு பெரிய மனம் படைத்தவர் என்று காட்டியது. தன்னலமற்று, பிறருக்கு உதவுவதில் நிறைவு காண்பவராக இருந்தார். ஜனநாயக கூட்டமைப்பிற்கு புத்துயிரளிக்க யாழ் மாநகர சபையின் செயற்பாடுகளில் தமிழ்க் கூட்டமைப்பில் இணைந்து உள உறுதியுடன் செயற்பட்டமை பல வழிகளிலும் அர்ப்பணிப்போடு தமிழ் மக்களுக்குச் சேவை செய்தமை என்பன றொபேர்ட் தொடர்பான எனது கணிப்பீடுகள் சரியானவை என்பதை பறைசாற்றின.

வரலாற்றில் ஏற்பட்ட விபத்தால் 1980 களின் முற்பகுதியில் ஏனைய இலட்சியம் நிறைந்த தமிழ் இளைஞர்களைப் போல றொபேர்ட்டும் தன்னை ஒரு விடுதலை இயக்கத்தில் இணைத்துக்கொண்டார். ஆயுத வல்லாதிக்கம் இல்லாத அந்த இயக்கத்தை தமிழ் பாசிச அரசியல் பலி கொண்டது. அந்த இயக்கத்தில் இருந்தவர்களில் சிலர் ஆதிக்கமுடையோருடன் இணைய, துரோகிகளாக முத்திரை குத்தப்பட்ட பலர் பழிவாங்கப்பட்டனர். வேறு பலர் வெளிநாடுகளுக்குச் சென்று தப்பி வாழும் இலகுவான வழியை தேர்ந்nடுத்தனர்.

பல போராளிகளின் நம்பிக்கைக்குரிய தலைவராக இருந்த றொபேர்ட் இந்த வழிகள் எதனையும் தேர்வு செய்யவில்லை அவர்களைக்கைவிட அவர் தயாராக இல்லை. நாட்டில் இருந்து தமிழ் மக்களின் ஜனநாயகத்திற்கான அரசியல் இடைவெளியை நிரப்பவும் தன்னை நம்பியவர்களைக் கைவிடாதிருக்கவும் தீர்மானித்தார்.

இது காலபோக்கில் அவருக்கும் அவரைப் போன்ற ஏனையவர்களுக்கும் விடுக்கப்பட்ட உயிர் அச்சுறுத்தல் காரணமாக இராணுவத்தினரைச் சார்ந்து செயற்பட வேண்டிய நிர்ப்பந்தத்துக்குள் தள்ளியது. இது ஒரு அவல நிலையே. புலிகளின் கொலைப் பயமுறுத்தலிலிருந்து தப்ப இராணுவப் பாதுகாப்பைப் பெற வேண்டிய நிலைமைக்குத் தள்ளப்படும் இலட்சியவாதிகளுக்கு எதிரானது தமிழ் அரசியல்போக்கு.

றொபேட்டின் தமிழர் நலன் சார்ந்த ஆற்றலையும் நியாயபாட்டையும் மறுத்தொதுக்க முடியாத அதேசமயம் தமிழ் தேசியத்தின் அழுகல் நோய்த் தன்மையைத் தமிழ்க் கூட்டமைப்பைச் சேர்ந்த பிரமுகர் ஒருவர் பின்வருமாறு வெளிப்படுத்தினார்.
ஆம் யாழ்ப்பாணத்திலுள்ள ஒவ்வொருவரும் சொல்வார்: றொபேர்ட் நல்லவர், மக்களுக்குப் பல்வேறு வழிகளிலெல்லாம் உதவிகள் புரிந்தார் என்பதை. ஆனால் ஏன் இவர் ஈ.பி.ஆர்.எல்.எப் வரதர் அணியில் இருந்தார்?

சொரணையற்ற அந்தப் பதில் இவ்வாறான கொலைகளைத் தமிழ் அரசியல்வாதிகள் எப்படித் தங்கள் பதவிகளுக்காகப் பயன்படுத்தி சென்று கொண்டிருக்கிறார்கள் என்பதை புரிய வைக்கும். நான் றொபேர்ட்டை கடைசியாக பார்த்தபோது அவரது நடவடிக்கைகள், அசைவுகள் யாவும் கட்சி அலுவலகங்களுக்குள்ளேயே முடக்கப்பட்டிருந்தன. இந்த முடக்கத்தால் நான் முதலில் பார்த்த மெல்லிய உயரமான றொபேர்ட் உடற்பருமன் அதிகரித்துக் காணப்பட்டார். வேட்டையாடப்பட்ட ஒரு மனிதனாக, தனிமையில் அலையவிடப்பட்ட அவரது வாழ்க்கை, மனைவி, குழந்தைகள் போன்ற சுகங்களுக்கு அனுமதியளிக்கவில்லை. அவருடன் நான் உரையாடிய வேளைகளில் என்னிடம் இல்லாத துணிகர இலட்சிய உள்ளத்தை அவரிடம் இனங்கண்டேன். வெகுவிரைவில் அரவது தந்தையைக் கொன்றவர்களாலேயே இவரும் கொல்லப்பட போகிறார் என்றுணர்ந்தேன். என்னையறியாமல் இரு சொட்டுக் கண்ணீர் சிந்தின. உடனே அவரும் அதைக் கவனிக்காதது போல் இருந்துவிட்டார். ஆனால் அப்படியான அந்தத் தருணங்களில் அவரை விரும்புவதற்கும், அவரிடமுள்ள மனிதத்துவத்தை இனங் காணவும் பலர் இருக்கிறார்கள் என்பதை அவர் உணர்ந்திருந்தால் துக்கம் கவிந்த இந்த நேரத்தில் அது என் இழப்பைச் சற்றேனும் ஈடு செய்யும்.

றொபேர்ட் எனக்கு எவ்வாறு உதவினார் என்பதை விபரித்து ஒரு நீண்ட புகழுரை எழுதவே விரும்பினேன். எனது பெயரைக் குறிப்பிடவும் விரும்பினேன். ஆனால் அது எனது பாதுகாப்புக்கு அச்சுறுத்தலாக அமையும் என்று கடுமையாக எச்சரித்து எனது குடும்பத்தவர்கள் தடுத்தனர். என்னில் தங்கி வாழும் மனைவி பிள்ளைகள் எனக்குண்டு. றொபேர்ட்டின் பூதவுடல் கனத்தையிலுள்ள ஒரு மலர்ச்சாலையில் வைக்கப்பட்டிருப்பதாக அறிகிறேன். அவரது ஒரேயொரு சகோதரியும் கனடாவிலிருந்து வந்திருப்பதாக அறிகிறேன். மலர்ச்சாலைக்கு சென்றாவது றொபேர்ட்டுக்கு எனது அஞ்சலியை செலுத்த ஆசைப்பட்டேன்.



ஆனால் எனது குடும்பத்தவர்கள் மிகுந்த பயத்தோடு அதற்கும் மறுத்துவிட்டனர். அங்கு செல்ல வேண்டாம் என்று என்னிடம் கூறும்படி த.வி.கூ முக்கியஸ்தர்களிடமும் என் குடும்பத்தவர்கள் கோரியிருந்தனர். அவர்களுக்கும் றொபேர்ட் மீது மதிப்பும் அன்பும் இருந்தபோதும் யாழ்ப்பாணத்தில் வைக்கப்பட்டிருந்த றொபேர்ட்டின் பூதவுடலுக்கு அஞ்சலி செய்யப் போகவில்லை. அப்படி போவதன் மூலம் நானும் கொலையாளிகளினால் கவனிக்கப்படும் ஒருவனாகிவிடுவேன் என்று அந்த முக்கியஸ்த்தர்கள் என்னை எச்சரித்தனர். அபாய விளையாட்டு வேண்டாம் என்று உணர்த்தினர்.

நானும் இங்குள்ள சாதாரணர்களில் ஒருவன். கோழை என்பதை ஒப்புக்கொள்கிறேன். உயர்ந்த கோபுரம் போன்ற றொபேர்ட்டின் துணிகரமான மக்கள் பக்தி, இளமை நிரம்பிய இலட்சியவாதம் ஆகியவற்றுக்கு முன்னால் மிகக் குறகியதும் சாதாரணமானனுமான கோழை நான். தனது மரணத்தினால் இந்தத் தமிழ்ச் சமூகமே எப்டியாக இருக்கிறது என்றும், எப்படி மரணத்தில் கூடத் தன் நண்பர்களைக் குறிப்புக்காட்ட முடியாத சமூகமாக அச்சத்தில் குமைந்து கிடக்கிறது என்பதையும் றொபேர்ட் காட்டிச் சென்றுள்ளார்.

ஆனால் அவரது சகோதரிக்கு குடும்ப அங்கத்தவர்களுக்கு நான் ஒன்றை கூற விரும்புகின்றேன். அவரது மரணச் சடங்கில் ஈ.பி.ஆர்.எல்.எப் அங்கத்தவர்கள் அல்லாதோர் மிகச் சொற்ப எண்ணிக்கையாளராக இருக்கலாம். ஆனால் உண்மையில் றொபேர்ட் எதற்காக போராடினார் என்பதை மதிக்கும், ஏற்றுக் கொள்ளும் அவரது மனித நேயத்தை ஏற்று உணர்ந்த பல கோழைகள் இருக்கின்றனர். ஒரு நாள் அவர்கள் எமது நண்பன் றொபேர்ட் என்று கூறும் சூழல் நிச்சயம் வரும். தன்னை படைத்தவரை றொபேர்ட் சந்திக்கும் போது ஏனைய தமிழ்ச் சமூகத்தவர்களிலும் பார்க்க மிகுந்த கருணையுடனேயே கணிக்கப்படுவார்.

தமிழ்க் கோழை
Daily News
21.06.2003
(2003 ஜூன் 21ம் திகதி Daily News பத்திரிகையில் வாசகர் ஒருவர் எழுதியிருந்த கடிதத்தின் தமிழாக்கம்)


Read more...

Saturday, June 11, 2022

ராஜீவ் காந்தி கொலையில் புலிகளின் தொடர்பு : முடிச்சி எவ்வாறு அவிழ்ந்தது? தொடர் 01

சரியாக 31 ஆண்டுகளுக்கு முன்பு ஸ்ரீ பெரும் புதூரில் இனவாதிகளால் கொல்லப்பட்ட தன் தாய் இந்திராவின் சிலைக்கு மாலை அணிவித்து விட்டு வரும் வழியில் இடைமறித்து மாலையிட்ட கூட்டத்தின் நடுவில் இருந்த தற்கொலை படை பெண் தனுவால் கொல்லப்பட்டார் ராஜிவ். அவருடன் 10 பொது மக்களும் 6 காவலர்களும் உயிர் இழந்தனர், பலர் காயமுற்று உறுப்புகளை இழந்து கதறினர், ராஜிவ் உடல் பிரதே பரிசோதனைக்காக அனுப்பபட்டது.

காயம் அடைந்தவர்களை மருத்துவமனைக்கு அனுப்பிய பின்னர் இறந்தவர்கள் உடல்களும் உடமைகளும் சேகரிக்கப்பட்டது. அப்பொழுது கேமிராமேன் ஹரிபாபு உடலும் அவனுடன் cannon camera வும் கிடைத்தது குண்டு வெடிப்பு நடைபெற்ற பகுதியில், பல பொருட்கள் சிதறிக் கிடந்தன. அங்கிருந்து ஓடியவர்கள் விட்டுச் சென்ற ஏராளமான செருப்புகள், ஹேன்ட்-பேக்கள், பைகள் என்று தரையெங்கும் பல பொருட்கள் சிதறிக் கிடந்தன.

அந்தப் பொருட்களைப் போல ஒரு பொருளாகவே, இந்த கெனான் காமெராவும், பத்தோடு பதினொன்றாக சேகரிக்கப்பட்டது. எவ்வித உயர் பதவியிலுமில்லாத சாதாரண பொலிஸ் கான்ஸ்டபிள் ஒருவரால் இந்த காமெரா பத்திரப்படுத்தப் பட்டது. இந்த காமெராவுக்கு உள்ளேயுள்ள பிலிம் ரோலில்தான், மனித வெடிகுண்டாக வந்து ராஜிவ் காந்தியைக் கொன்ற பெண்ணின் உருவமும், அவருக்கு துணையாக வந்திருந்த மற்றையவர்களின் உருவங்களும், குண்டு வெடிப்பைத் திட்டமிட்டுக் கொடுத்தவரின் உருவமும், வெவ்வேறு பிரேம்களில் பதிவாகியிருந்தன. இந்த ஒற்றைக் காமெரா மாத்திரம் புலனாய்வாளர்களின் கைகளில் கிடைக்காதிருந்தால், ராஜிவ் காந்தியை கொன்றது யார் என்பது, இன்றுவரை கேள்விக் குறியாகவே இருந்திருக்கும்!

கேமிராமேன் ஹரிபாபு எடுத்த புகைப்படத்தை பற்றிய முக்கியதுவத்தை தமிழக காவல்துறை அறியும் முன்பே ஹிந்து பத்திரிக்கை அறிந்து இருந்தது. பிரிண்ட் போட கொடுத்த இடத்தில் இருந்து கைப்பற்றி அதை மே 23 ல் வெளியிட்டது. தமிழக காவல்துறையினரிடமிருந்த 10 போட்டோக்களின் நெகட்டிவ் பிலிம் ரோல்களையும், போட்டோ எடுக்க உபயோகிக்கப்பட்ட கேமராவையும் பெற்றுக் கொண்டது சி.பி.ஐ. தமக்குக் கிடைத்த போட்டோக்களை சி.பி.ஐ. ஒவ்வொன்றாக ஆராயத் தொடங்கியது.

முதலாவது போட்டோவில், லதா கண்ணன் மற்றும் அவரது மகள் கோகில வாணி( ராஜிவ்வை சந்திக்க வந்து உயிர் விட்டவர்கள் ) ஆகியோருக்கு நடுவே, யார் என்று அடையாளம் காணப்படாத பெண், நின்றிருந்தார். மனித வெடிகுண்டு என்று ஹிந்து பத்திரிகையால் சந்தேகம் கிளப்பி விடப்பட்ட அந்தப் பெண்ணுக்கு சற்று தொலைவில், பைஜாமா-குர்தா அணிந்த மற்றொரு நபர் நின்றிருந்தார். போட்டோவில் இருந்த மூன்று பெண்களும் இறந்துவிட்டனர். ஆனால், அதில் நின்றிருந்த நான்காவது நபரான ஆண், சம்பவம் நடந்த இடத்தில் இறந்து போனவர்கள் பட்டியலில் இல்லை. காயமடைந்து, மருத்துவமனையில் அனுமதிக்கப்பட்டவர்களின் பட்டியலிலும் அவர் காணப்படவில்லை. யார் அந்த நபர்?

பிலிம் ரோலில் இருந்த முதலாவது போட்டோவே, இரு முக்கிய மர்மங்களை ஏற்படுத்தி விட்டது. லதா கண்ணன் மற்றும் அவரது மகள் கோகில வாணி ஆகியோருக்கு நடுவே நின்றிருந்த பெண், மற்றும் அதே போட்டோவில் இருந்த ஆண் ஆகிய இருவரின் அடையாளமும் தெரியவில்லை என்பது முதலாவது மர்மம். அந்த ஆண், கொல்லப்பட்ட மர்மப் பெண்ணுடன் தொடர்புடைய நபரா? இது, இரண்டாவது மர்மம்.


கேள்விகளுக்கு விடை தெரியாத நிலையில், இந்த முதலாவது போட்டோவை ஹோல்டில் வைத்துக்கொண்டு, மற்றைய ஒன்பது போட்டோக்களையும் ஆராய்ந்தது சி.பி.ஐ.
இரண்டாவது போட்டோவில், பொதுக்கூட்டத்தில் பெண்கள் பகுதியில் இருந்தவர்கள் காட்சியளித்தனர்.
மூன்றாவது போட்டோவில் சினிமா இசை அமைப்பாளர் (சங்கர்) கணேஷ், காங்கிரஸ் ஆதரவாளரும், காண்ட்ராக்டருமான ஒருவருடன் பேசிக்கொண்டிருந்தார்.
இந்த மூன்று போட்டோக்களும், பொதுக்கூட்டம் நடைபெற்ற இடத்துக்கு ராஜிவ் காந்தி வருவதற்கு முன் எடுக்கப்பட்டிருந்தன.
நான்காவது போட்டோவிலிருந்து எட்டாவது போட்டோ வரையில், ராஜிவ் காந்தி வருகை, பொதுமக்களைப் பார்த்து அவர் கையசைத்தது, காங்கிரஸ் தொண்டர்கள் பலர் ராஜிவ் காந்திக்கு சால்வைகள், மாலைகள் அணிவித்தது ஆகியவை காணப்பட்டன.
ஒன்பதாவது போட்டோவில், ராஜிவ் காந்தியிடம் கோகிலவாணி (கோகிலா) கவிதை வாசித்துக் காண்பிப்பது பதிவாகியிருந்தது. அது நடைபெற்ற ஓரிரு நிமிடங்களிலேயே குண்டு வெடித்திருந்தது. ராஜிவ் காந்தி கொல்லப்பட்டார்.
அந்த வகையில், ராஜிவ் காந்தியை கடைசியாக உயிருடன் எடுக்கப்பட்ட போட்டோ, அந்த ஒன்பதாவது போட்டோதான்! இந்த போட்டோவில், பச்சை, ஆரஞ்சு நிற சல்வார் கமீஸ் பெண், ராஜிவ் காந்தியை நோக்கி நகர்ந்து வந்தது தெரிந்தது.
பத்தாவது போட்டோ, குண்டுவெடிப்பையே காட்டியது.

ராஜிவ் காந்தியும், மற்றையவர்களும் உயிரிழந்த அந்த விநாடி, ஹரிபாபுவின் கேமராவில் பத்தாவது போட்டோவாகப் பதிவாகியிருந்தது. அந்த விநாடியில், போட்டோ எடுத்துக் கொண்டிருந்த ஹரிபாபுவும், அவரது கேமரா பதிவு செய்த அதே குண்டுவெடிப்பில் கொல்லப்பட்டிருந்தார்.

மறுபுறம் உயிர் இழந்த ஹரிபாபு வீட்டில் விசாரித்தால் எதாவது உண்மை கிடைக்குதா என விசாரிக்க சி.பி.ஐ அதிகாரிகள் சென்றனர். இந்த வழக்கின் முதல் முடிச்சு ஹரிபாபு வீட்டில் அவிழும் என அப்பொழுது அவர்களுக்கு தெரியாது.

ராஜிவ் படுகொலையின் பொழுது பாதுகாப்பு பணியில் ஈடுபட்ட சப்.இன்ஸ்பெக்டர் அனுசியா பேட்டி இணைக்கப்பட்டுள்ளது. இது இந்த படுகொலை பற்றிய புரிதல் ஏற்பட உதவும்


தொடரும்...


Read more...

Tuesday, June 7, 2022

மகா சங்கத்தினருக்கு ஆட்சியாளர்களால் எச்சரிக்கை மணி அடிக்கப்படுகின்றது. சாடுகின்றார் ஜனாதிபதி சட்டத்தரணி ரிலந்த வலலியத்த

வன்முறையை தூண்டக்கூடியதும் பயங்கரவாதத்தை ஊக்குவிக்கக்கூடியதுமான பிரச்சாரங்களை மேற்கொண்டு வருவதாக கலாநிதி சங்கைக்குரிய ஒமல்பே சோபித தேரர் மீது முறைப்பாடு செய்யப்பட்டுள்ளது. பொலிஸ் மா அதிபரிடம் மேற்கொள்ளப்பட்டுள்ள குறித்த குற்றச்சாட்டு தொடர்பாக ஊடகமொன்றுக்கு கருத்துரைத்துள்ள தேரர், தம்ம பதத்தின் 67 ம் பதத்தினை (எந்தக் கருமத்தைச் செய்தால் பின்னால் மனம்நோகுமோ, எதன் பயனை அழுதுகொண்டே அனுபவிக்க வேண்டியிருக்குமோ, அது நற்செயல் ஆகாது.) வாசித்திராத , வாசித்து புரிந்து கொள்ள போதிய அறிவற்ற நபர்களுக்கு புத்தரின் போனைகளை போதிப்பது குற்றங்களாகவே தெரியும் என்று கூறியுள்ளார்.

தொடர்ந்து கருத்துரைத்த ஒமல்போ சோபித தேரர் ராஜபக்சக்கள் விகாரைகளுக்கு சென்றாலும் அவர்கள் பௌத்தர்கள் அல்லவென்றும் நாட்டிலுள்ள குழந்தைகளுக்கு இந்நாட்டில் ஒரு சொட்டு பால் இல்லாதபோது அவர்கள் திருப்பதியிலுள்ள லிங்கத்திற்கு பால்வார்க்க செல்கின்றார்கள் என்று சாடியுள்ளார்.

புத்தரின் போதனைகளை இந்த நாட்டில் போதிப்பது எவ்வகையில் குற்றமாகின்றது என பிரபல ஜனாதிபதி சட்டத்தரணியான ரிலந்த வலலியத்தவிடம் ஊடகம்மொன்று கருத்துக்கேட்டபோது, இது வணக்கத்திற்குரிய ஒமல்பே சோபித தேரருக்கு விடுக்கப்பட்ட அச்சுறுத்தல் அல்லவென்றும் ஒட்டுமொத்த மகா சங்கத்தினருக்கும் அடிக்கப்பட்டுள்ள எச்சரிக்கை மணி என்றும் தெரிவித்துள்ளார். அவ்வாறு ஆட்சியாளர்கள் மகா சங்கத்தினருக்கு அச்சமூட்ட முற்படுவார்களானால், ஆட்சியாளர்களுக்கு எச்சரிக்கை விடுப்பதை விட தனக்கு மாற்று வழியில்லை எனக்கூறியுள்ளார் சட்டத்தரணி ரிலந்த வலலியத்த.

ஆட்சியாளர்களுக்கும் மகா சங்கத்தினருக்குமிடையே ஏற்பட்டுவரும் முறுகலானது பெரும் எழுச்சி ஒன்றுக்கு வழிவகுக்கலாம் என ஆய்வாளர்கள் நம்புகின்றனர். தேரர்கள் இந்நாடு பௌத்த போதனைகளின் அடிப்படையில் ஆட்சி செய்யப்படவேண்டுமென்றும், கொள்ளையடித்தலும் , அதனை மக்கள் அனுமதித்தலும் நிர்வாணத்துக்கான வழியில்லை என போதிக்க ஆரம்பித்திருப்பது மக்களின் மனங்களில் , அவர்களின் வாழ்கை முறையில் மாற்றங்களை ஏற்படுத்தும் என பலமாக நம்பப்படுகின்றது.



Read more...

Monday, June 6, 2022

வெடிக்கும் நிலையிலுள்ள எரிமலைமீது வீற்றிருக்கின்றோம். 10 வருடங்களுக்காவது வரப்பிரசாதங்களை தியாகம் செய்யுங்கள்.

இலங்கையின் இன்றைய பொருளாதார நிலையில், அரச சேவையின் சுமையினை தாங்க முடியாத நிலைக்கு நாடு வந்துள்ளதாகவும், எதிர்கால சந்ததியினராவது இந்நாட்டில் வாழக்கூடியதோர் நிலை உருவாக வேண்டுமாகவிருந்தால் இன்று நாட்டிலுள்ள நிறைவேற்று அதிகாரமுள்ள ஜனாதிபதி, பாராளுமன்ற உறுப்பினர்களிலிருந்து அரச ஊழியர்கள் வரை அனைவரும் தாங்கள் அனுபவித்து வருகின்ற வரப்பிரசாதங்களை குறைந்தது 10 வருடங்களுக்காவது தியாகம் செய்ய முன்வரவேண்டுமென வேண்டுதல் விடுத்துள்ளார், திவால் என தன்னை அறிவித்துக்கொண்டுள்ள இலங்கையின் உள்நாட்டலுவல்கள் அமைச்சின் புதிய செயலாளராக பதவியேற்றுள்ள மாயாதுன்ன.

கடந்த 29 ம் திகதி இடம்பெற்ற அரச சேவையாளர்கள் சங்கத்தின் நிகழ்வொன்றில் பேசிய அவர், மொத்த அரச சேவையாளர்களின் எண்ணிக்கை 15 லட்சங்களை தாண்டிச் சென்று விட்டதென்றும் இலங்கையின் அரச சேவையாளர்களின் எண்ணிக்கை 5 லட்சத்திலிருந்து 8 லட்சத்திற்கு மேலே செல்லும் பட்சத்தில் ஏற்படக்கூடிய ஆபத்தினை 2004 ம் ஆண்டு அன்றைய ஜனாதிபதியின் செயலாளருக்கு தான் எழுதிய கடிதத்தில் எச்சரித்ததாக நினைவுகூர்ந்த அவரது பேச்சின் மொழிபெயர்ப்பு கீழே தரப்படுகின்றது.

இந்த நாட்டில் உங்களுக்கு வாழமுடியாத வகையிலான அரச நிர்வாகமொன்றை உருவாக்கித்தந்த முன்னோர்கள் என்ற வகையில், நான் உங்களிடம் முதலில் பகிரங்கமாக மன்னிப்புக்கோர வேண்டும். இன்றைய நிலையில் எமது அரச நிர்வாகத்தில் இருக்கின்ற இடைநிலை ஊழியர்களிலிருந்து அதற்கு கீழுள்ள சகல ஊழியர்களும் நாளாந்தம் வேலைக்கு வருவதே பாரிய பிரச்சினையாகியிருக்கின்றது. தை மாதத்தில் போக்குவரத்திற்கு பத்தாயிரம் செலவழித்தவர்கள் மார்ச்மாதமளவில் 15000 ரூபா செலவுசெய்யவேண்டியாகி இன்று அது இருபது இருத்திஐயாயிரம் வரை உயர்ந்துள்ளது.

40 ரூபா கொடுத்து பொதுப்போக்குவரத்தில் வந்த எமது காரியாலயங்களிலுள்ள சிற்றூழியர்கள் இன்று 120 லிருந்து 150 ரூபா வரை கொடுக்க வேண்டியுள்ளது. அவர்களது போக்குவரத்து செலவினையும் உணவு மற்றும் ஏனைய அத்தியாவசிய செலவுகளையும் கூட்டிக்கழித்துப்பார்த்தால் வருடத்திற்கு ஒருமுறையாவது தொழிலுக்கு வருவதற்கு ஒரு புதிய ஆடையையோ, பாதணியையோ கொள்வனவு செய்யமுடியுமா என்பது சந்தேகமே.

இது இவ்வாறிருக்கும் சூழ்நிலையிலும்கூட நான் நேற்று சில அமைச்சர்களுடன் ஒரு கூட்டத்தில் அமர்ந்திருந்தபொழுது, அரச சேவையில் இருப்பவர்களுக்கு சம்பள அதிகரிப்பு வழங்குவது பற்றி பரிசீலிக்கப்படுவதாக பேசப்பட்டது. இந்த செய்தியை வெளியிட்டு இன்று நாட்டில் எவ்வித சம்பளமும் எடுக்க முடியாமல் இருப்பவர்களிடம் எங்களையும் அடிவாங்க செய்யாதீர்கள் என்று அவ்விடத்தில் நான் கூறினேன். அத்துடன் முடிந்தால் அரச ஊழியர்களுக்கு போக்குவரத்து செலவிற்கு உதவும் வகையில் ஏதாவது சலுகையை பெற்றுக்கொடுக்கமுடிந்தால் உதவியாக இருக்குமென்றும் கூறினேன்.

எங்கள் எல்லோருடைய மனச்சாட்சியின் உணர்வுகளில் ஏற்றத்தாழ்வுகள் பலவாறு இருக்கலாம். ஆனால் முப்பது வருடங்களோ அதற்கு மேலோ அரச நிர்வாக சேவைகளில் நாங்கள் இருந்திருப்போமேயானால் நாங்களும் ஏதோவொரு வகையில் இன்றைய நிலைக்கு பொறுப்புக்கூறியேயாக வேண்டும். அதிலும் ஏற்றத்தாழ்வுகள் இருக்கக்கூடும். நாங்கள் இங்கே பேசுகின்ற விடயங்கள் எல்லாவற்றையும் விரும்பியோ விரும்பாமலோ, இந்த நாட்டில் நடைமுறைப்படுத்தியேயாகவேண்டிய நிலையில் நாம் இருக்கின்றோம்.

ஏனென்றால் அடுத்துவரும் ஓரிரு மாதங்களில் இந்த நாடு அதாள பாதாளத்தை நோக்கி விழத்தான் போகின்றது. ஏனெனில் இம்முறைக்கான சிறுபோக விளைச்சல் வீழ்ச்சியடைந்திருக்கும் நிலையிலிருந்து சாதரண நிலைக்கு தூக்கி நிறுத்த முடியும் என்பதற்கு எவ்வித உத்தரவாதமும் எம்மிடமில்லை. வேறுகாலங்களாக இருந்தால் ஆகக்குறைந்தது பக்கத்து நாடுகளிலிருந்தாவது உணவை பெற்றுக்கொண்டிருக்க முடியும். கடனாகவோ அல்ல பிச்சையாகவே பெற்றுக்கொண்டிருக்கலாம். ஆனால் இன்று எமது நிலை அப்படியில்லை. பங்களாதேஷ; போன்ற ஒரு நாட்டின் உபரி உற்பத்தியாக இருக்கின்ற ஐந்து வீத உற்பத்தியானது, எமது நாட்டின் மொத்த உற்பத்திக்கு சமன் என்ற நிலையிலேயே நாம் இருக்கின்றோம்.

இன்று உலகத்தின் எல்லா நாடுகளிலும் உணவுற்பத்தி விகிதாசாரம் வீழ்சியடைந்துவருகின்ற காலம். நாற்பதுக்கு மேற்பட்ட நாடுகளில் ஏற்கனவே உணவுத்தட்டுப்பாட்டு நிலை உருவாகியிருக்கின்றது. இன்னும் பல நாடுகள் அதை நோக்கி பயணித்துக்கொண்டும் இருக்கின்றது. எமது நாட்டில் சிறுபோக உற்பத்தியாளர்கள் 50-55 வீதத்தினரே தற்போது வயலில் சேற்றுக்குள் காலை வைத்திருக்கின்றார்கள். ஆகவே எமது உணவு நெருக்கடி என்பது மிக கடுமையாக இருக்கப்போகின்றது என்பது வெள்ளிடைமலை.

இந்த நெருக்கடி நிலையை இன்று இந்த மண்டபத்தில் அமர்ந்திருக்கின்ற இளம் சமூகத்தினாரால் புரிந்துகொள்ள முடியாமல் இருக்கலாம். ஆனால் எம்மை போன்ற 50 களிலும் 60 களிலும் பிறந்தவர்களுக்கு ஒரு றாத்தல் பாணை வாங்குவதற்கு பேக்கரிகள் முன்பாகவும் , புதிய ஆடையொன்றை தைப்பதற்கு துணிவாங்குவதற்கு கூட்டுறவு சங்ககடைகளின் முன்னால் பங்கீட்டு அட்டையுடனும் வரிசைகளில் நின்றது நினைவிருக்கின்றது. இதற்கு பிற்பட்ட இன்னொரு காலமிருந்தது, சிவில் யுத்தம் நடந்த காலத்தில் வடக்கு கிழக்கில் ஒருபோத்தல் மண்ணெண்ணை 800 -1000 ரூபாவிற்கு வாங்க வேண்டிய நிலையும் சாப்பிடுவதற்கு மூன்று நேர உணவு இல்லாத நிலையும் நிலவியது. நாம் இன்று எமது கையிலிருக்கும் கடனட்டைகளுக்கு கூட எந்தவித பெறுமதியுமற்றுப்போகும் நிலையை நோக்கியே பயணித்துக்கொண்டிருக்கின்றோம். இன்னும் சில நாட்களில் எரிபொருளுக்காக வரிசையிலே நின்று எரிபொருள் கிடைக்காமல் வாகனத்தை அந்த இடத்திலேயே விட்டுவிட்டு வீட்டுக்கு நடந்துவரும்காலம் எம்முன்னேயுள்ளது. எம் எல்லோரினது வீட்டிலும் ஆகக்கூடியது 10 கிலோ அரிசி மட்டுமே வைத்திருக்கக்கூடிய நிலை உருவாகும். அப்படி அரிசி முடிகின்ற நேரத்தில் ஒன்று இரண்டு மூன்று என ஒவ்வொரு கடையாக சென்று அங்கும் அரிசி கிடைக்காமல் திரும்பி வரவேண்டிய நிலை உருவாகும். மேல் மாகாணத்திற்கு தேவையான அரிசி பாவனையில் 10 வீதம் கூட மேல் மாகாணத்தில் உற்பத்தி செய்யப்படுவதில்லை. 90 வீதமான அரிசி வெளியிலிருந்துதான் வந்தாகவேண்டும். நாம் அமர்ந்திருப்பது வெடிக்க தயாராக இருக்கும் எரிமலையில் மீது என்பது உங்களுக்கு புரிந்திருக்கும். அந்த வகையில் நேற்று அமைச்சர்களுடன் இடம்பெற்ற கூட்டத்தில் அரச ஊழியர் சங்கத்தினால் முன்மொழியப்பட்டு முன்வைக்கப்பட்ட வேலைத்திட்டத்தில் அச்சங்கமானது முழுமூச்சாக தன்னை ஈடுபடுத்திக்கொள்வற்கு தயார் என அறிவித்தனை நான் இங்கு மகிழ்சியுடன் அறியத்தருகின்றேன்.

எனவேதான் 15 லட்சத்திற்கு மேற்பட்டிருக்கின்ற அரச ஊழியர்கள் அனைவரும், தாம் இருக்கும் உத்தியோகபூர்வ இல்லங்களிலோ அல்லது சொந்த இல்லங்களியோ ஒரு சிறுதுண்டு மரவள்ளித்தண்டையும் வற்றாளைக்கொடியின் சிறுதுண்டையும்கூட வீணாக்காமல் குறுகியகாலப்பயிராக ஊண்டுவோமென உறுதியெடுக்கவேண்டும். அப்படியானால் மட்டுமே எதிர்வரும் நெருக்கடியின்போது மூன்று நேர உணவு அல்லது இரண்டுநேர உணவு அதுவும் முடியாவிட்டால் ஒரு நேரத்திற்கு ஒரு கறியும் சோறுமாவது உண்ணும் நிலையில் இருப்போம் என்பதை நினைவில் கொள்ளவேண்டும். இதுதான் நாம் முகம்கொடுத்துக்கொண்டிருக்கின்ற நெருக்கடியின் உண்மையான நிலைமையாகும்.

இந்த நிலைமை புரியவில்லையானால் அவர்கள் எந்தவிதமான அறிவாற்றலும் அற்றவர்களென்றே கணிக்கப்படவேண்டும். மூன்று நான்கு மாதங்களுக்கு முன் அல்லது ஒரு வருடத்திற்கு முன்னர் காலையில் ஒரு கோப்பை பால்குடித்த நாம், அதை இன்று எமது பட்டியலிலிருந்து நீக்கியுள்ளோம். பாண் எமது பட்டியலிலிருந்து அகற்றப்பட்டுள்ளது. மாலையில் வேலைமுடிந்து போகும்போது சிற்றுண்டியொன்றை வாங்கிச்செல்வது எமது பட்டியலிலிருந்து நீங்கப்பட்டுள்ளது. இந்த நெருக்கடியானது படிப்படியாக நெருக்கி கசக்கி ஒரு குறிப்பிட்ட இடத்திற்கு எம்மை கொண்டுவந்துள்ளது. இது இதையும் தாண்டி இன்னும்போகும். வரவர நெருக்கடி கூடியே தீரும். எனவே நாம் இவ்விடயத்திற்கு முன்னுரிமை கொடுத்து சிந்தித்துச் செயலாற்ற வேண்டும்.

ஆனால் எங்களைப்போன்றவர்களுக்கு இது புத்தியில் உறைக்கவேண்டுமென்றால், இவ்வாறான அனர்த்தம் நிகழவே வேண்டும். இல்லாவிட்டால் ஒருபோதும் திருந்தாத நாடு இது. இந்த மிக நெருக்கடியான காலகட்டத்தில் ஆகக்கூடியது 15 அமைச்சர்களுடன்கூடிய ஒரு நிர்வாக கட்டமைப்பில் அடுத்த ஆறு மாதத்திற்கு முன்நோக்கி போகலாம் என்பதுதான் எனது நம்பிக்கையாகவும் எதிர்பார்ப்பாகவும் இருந்தது. எங்களைப்போன்றவர்கட்கு மேலதிக செயலாளர்கள் நிலைக்குப்போவதில் எந்த பிரச்சினையும் இல்லை. ஆறு மாத காலமோ அல்லது ஒரு வருடகாலமோ அல்ல 6 வருடகாலமாயினும் இந்நாடு திருந்துமாக இருந்தால் எம்மால் அதனை தாங்கிக்கொள்ள முடியும்;. இந்த நாட்டை தூக்கி நிறுத்த முடியுமாக இருந்தால் நாம் இந்த பதவிகளை விட்டுப்போய் இதற்கு வேறுயாராவது வந்தாலும் பிணக்குகள் இல்லை. எது எப்படியோ, இந்த சிக்கலான அவசரமான சூழ்நிலைக்கு முகம்கொடுப்பதற்கென்றே ஒரு அவசரகால திட்டத்தை நாம் தயாரித்தே ஆகவேண்டும். இல்லாவிட்டால் எம்மால் இதற்கு முகம்கொடுக்க முடியாது. சகல வரப்பிரசாதங்களையும் பின்போடத்தயாராக வேண்டும். உதாரணத்;திற்கு நேபாளத்தில் பின்பற்றப்பட்டதுபோல் தனிநபர் வருமானம் வருடமொன்றுக்கு பத்தாயிரத்தை எட்டும்வரை எவருக்கும் சம்பள உயர்வுகளோ நலன்களோ வழங்கப்படமுடியாது, கேட்கப்படமுடியாது என்ற நிலைக்கு நாம் வந்தேயாகவேண்டும்.

இன்று உங்கள் கையியுள்ள சொத்துக்களின் பெறுமதி வெறும் கடதாசித்துண்டுகளே. எனவே நாட்டின் தனிநபர் வருமானம் வருடமொன்றுக்கு பத்தாயிரம் என்ற நிலைக்கு கொண்டுவந்ததன் பின்பே இவை வழங்கப்படலாம் என்பதே ஜதார்த்தம். எனவே இந்த மீள்சீரமைப்பு நிகழ்சிநிரலின் கீழ் நாட்டின் நிறைவேற்று அதிகாரம் , பாராளுமன்றத்தில் தொடங்கி பிரதேச சபை மந்திரிகள் வரை மற்றும் அமைச்சின் செயலாளர்களில் தொடங்கி அவர் கீழிருக்கும்; சகல ஊழியர்கள் வரைக்கும் நீங்கள் ஏதாவது வரப்பிரசாதங்களை பெற்றுக்கொள்ள மனதில் நினைத்திருந்தால் அதனை பத்துவருடங்களுக்கு பின்போட்டுக்கொள்ளுங்கள். அது மட்டுமன்றி சகலரும் இந்த பொது நிகழ்சிநிரலுக்குள் பணியாற்ற தயாராகவேண்டும். அதாவது அரச பணியில் எந்த தரத்திலிருக்கும் யாராக இருந்தாலும், அவர்கள் தங்களுக்குரிய வரிகளையும் , தங்களுடைய மின்சாரம்-நீர் பாவனைக்குரிய கட்டணங்கள் வரை சகலவற்றையும் உரியநேரத்தில் தவறாது செலுத்தவேண்டும்.

இது கேளிக்கைகளுக்கு செலவுசெய்யும் காலமும் அல்ல. சகல தொழல்சார் நிறுவனங்களும், நிபுணர்களும், சங்கங்களும் இந்த நிலைமையை இதயசுத்தியோடு திரும்பி பார்த்து இந்த அர்ப்பணிப்பை செய்யத்தாமாகவே முன்வருவதாக முன்மொழியவேண்டும். அப்படி இல்லாவிட்டால், அரச சேவையில் இருக்கின்ற நாமும் தெருவிலே மக்களிடம் உதை வாங்கவேண்டிவரும். இன்று நாடு ஓலமிட்டு வேண்டி நிற்கும் மீள்சீரமைப்பைப்பற்றித்தான் நான் இங்கு பேசிக்கொண்டிருக்கின்றேன். இதை இந்த நாடு நீண்டகாலமாக வேண்டி நிற்கின்றது.

எம்மளவுக்கு படித்த , விடயங்கள் தெரிந்த ஆனால் எம்மளவுக்கு பொறுத்துப்பொறுத்துப்போகும் வழும்பல் சமூகத்தை வேறெங்கும் காணமுடியாது. எனவே நாங்கள் பொறுத்திருந்தது போதும்! தொழில்சார் நிபுணர்கள் என்ற வகையில் நாம் இன்று கடுமையாக அழுத்திக்கூறவேண்டியது யாதெனில், உடனடியாக இந்த சீரமைப்பு திட்டங்கள் யாவும் சட்டமாக்கப்படவேண்டும். ஏனென்றால் இலங்கையில் வாய்கிழியப்பேசி உருவாக்கப்படுகின்ற தேசிய கொள்கைகத்திட்டங்கள் யாவுமே இறுதியில் குப்பைக்கூடத்தில் வீசப்படுவதைத்தான் நாம் பார்த்து வந்திருக்கின்றோம், பொறுத்து வந்திருக்கின்றோம். எனவே, இவை சட்டமாக்கப்படவேண்டும்.

மக்கள் பிரதிநிதிகளின் நலன்கள் சலுகைகள் அனைத்தும் பாராளுமன்ற சட்டத்திற்கூடாக வரையறுக்கப்படவேண்டும். அரசாங்கத்தால் அனைத்து சட்டங்களும் எந்தக்கட்சி ஆட்சிக்கு வந்தாலும் மாற்றப்படமுடியாதவாறு கொள்கையாக பிரகடனப்படுத்தப்படவேண்டும். படுமோசமான, எந்தவித பொறுப்புமற்று அபிவிருத்தித்திட்ட கொள்கைவகுப்புக்கள், நிர்வாக கட்டமைப்பு , ஆட்சேர்ப்பு போன்ற நீண்டகால அதிகார துஷ்பிரயோகத்தின் பிரதிபலனையே நாங்கள் இன்று அனுபவிக்கின்றோம். இன்று அரச சேவையின் சுமையினை தூக்க முடியாத நிலைக்கு இந்த நாடுவந்திருக்கின்றது. இதற்கு பரிகாரம்தேடுவதற்கு நாம் சர்வதேச நாணய நிதியத்திடம் செல்லவேண்டியதில்லை.

2004ம் ஆண்டளவில் அரச நிர்வாக சேவை அதிகாரியாக இருந்த பொழுது பட்டதாரிகளுக்கு நியமனம் வழங்குக்கும் விடயத்தில் அன்றிருந்திருந்த ஜனாதிபதியின் செயலாளருக்கு எழுதிய கடிதத்தில் , இவர்களுக்கு பத்தாயிரம் ரூபாவினை மாதமொன்றுக்கு வழங்கி அவர்களை வேறெங்காவது தொழில்புரிய பணிக்குமாறு அலோசனை வழங்கினேன் என்பது இன்றும் எனக்கு நினைவிருக்கின்றது . அதற்கு காரணம் அன்று அறுபது ஆயிரம்பேரை அரசசேவையில் இணைத்துக்கொள்ள மேற்கொள்ளும் முயற்சியானது நான் ஓய்வுதியம் செல்லும்போது எனக்கு ஒய்வூதியம் கிடைக்காது என அச்சப்பட்டேன். அது இன்று நிஜமாகி, நேரடியாக முகம்கொடுத்து நிற்கின்றேன். இந்த அரச வேவையானது ஐந்து லட்சத்திலிருந்து ஆகக்கூடியது எட்டு லட்சமாக இருந்தால் மட்டுமே சாத்திமாக இருக்கும் என்பது அன்றே எனக்கு புரிந்துகொள்ளக்கூடியாதாக இருந்தது. இன்று எம்கண்முன்னே அந்த ஆபத்து நிதர்சனமாகியுள்ளது.

இன்று ஓய்வூதியம் பெறும்ஒருவர் வெறுமனே ஊக்குவிப்பு கொடுப்பனவுகள் எதுவுமின்றி வெறும் ஓய்வூதியம் பெறும் நிலைக்கு தள்ளப்படுகின்றார். இன்று இந்த ஊக்குவிப்பு பணத்தை யாரிடம் போய்க்கேட்கப்போகின்றீர்கள். அங்கே அலுவலகத்தில் அமர்ந்திருக்கின்றவர்களிடம் ஊக்குவிப்பு பணம் கொடு என்றா கேட்கப்போகின்றீhகள்? வெளியே தொழிற்சங்கங்கள் கோஷமிடுகின்றார்கள் என்பதற்காக பணத்தை கொடுப்பதற்கு அந்த ஊழியரிடம் பணமேதுமில்லை. சம்பளஉயர்வு கோரிக்கை வந்தவுடன் வங்கிகளில் ஓவர்ட்றாப்பில் பணத்தை பெறுவது, பின்னர் வங்கிகளின் பணத்தை கொடுப்பதற்காக பணத்தை அச்சடிப்பது போன்ற கோமாளித்தனத்தை தொடர்ந்து செய்யமுடியாது. எனவே இந்த தசாப்பதம் என்பது அனைவரும் தியாகங்களை மேற்கொள்ளவேண்டிய தசாப்தமாகும்.

இன்று சகல பன்சலைகளும் , கோவில்களும், பள்ளிகளும் , தேவாலயங்களும் வழிபாடுகளை நிறுத்திவிட்டு நிலத்தை கொத்தி விவசாயம் செய்யவேண்டும். சகல பாடசாலைகளும் சகல ஆசிரியர்-பெற்றோர் சங்கங்களும் விவசாயம் செய்யவேண்டும். சுகல அரச நிறுவனங்களும் விவசாயம் செய்யவேண்டும். கடந்த காலத்தில் தலைக்குள் கொண்டுதிரிந்த பாழாய்ப்போன எண்ணங்களை தூக்கி வைத்துவிட்டு நேரமில்லை , எரிபொருள்இல்லை , உடலை வளைக்க முடியவில்லை என்று சொல்லிக்கொண்டிராமல் உடனடியாக செயலில் இறங்குங்கள். இதை உங்களால் செய்ய முடியாது விட்டால் உங்களுக்கு அருகிலுள்ள ஒருவருக்கு அந்த நிலத்துண்டை கொடுங்கள் எதாவது விதைக்கட்டும்.

அடுத்ததாக தங்களுக்கான மேலதிக நலன்களை 10 வருடங்களுக்கு பின்போடுமாறு எல்லோம் இணைந்து முன்மொழியுங்கள். தொழிற்சங்கங்கள் உட்பட சகல சங்கங்களும் முழுமையாக ஒரு றாத்தல் இறைச்சியைத்தாருங்கள் என கோரிக்கை வைக்கக்கூடிய காலமல்ல இது. எனவே இந்த நாட்டை சீரமைத்து தூக்கி நிறுத்த வேண்டுமென்றால், தூக்கிநிறுத்திய மாபெரும்பணியில் பங்காளர்கள் ஆகவேண்டுமென்றால் ஆகக்குறைந்தது பத்துவருடங்களுக்கு எமது நலன்களையும் நேரத்தையும் தியாகம் செய்யவேண்டியவர்களாகவுள்ளோம். அப்படியானால் மட்டுமே ஆகக்குறைந்தது எதிர்காலசந்ததியினராவது இந்த நாட்டில் தலை நிமிர்ந்து சுயகௌரவத்துடன் வாழமுடியும். எனவே நாம் இன்று ஆரம்பித்திருக்கும் இந்த நற்பணியில் கைகோர்த்து கொள்வோம்.

தமிழாக்கம் மனோரஞ்சன்


Read more...

Sunday, June 5, 2022

ரணிலின் ஆட்டம் ஆரம்பம்! மத்தியவங்கி ஆளுநரை நீக்குமாறு ஜனாதிபதிக்கு ஆழுத்தம்!

இலங்கை மத்தியவங்கியின் 17 வது ஆளுநராக பொறுப்பேற்றுள்ள டாக்டர் நந்தலால் வீரசிங்கவை பதவியிலிருந்து நீக்குமாறு பிரதமர் ரணில் விக்கிரமசிங்க ஜனாதிபதிக்கு அழுத்தம் கொடுத்துவருவதாக மவ்ரட்ட வாராந்த வெளியீடு செய்தி வெளியிட்டுள்ளது. இது தொடர்பாக பிரதமர் ஜனாதிபதிக்கு எழுதியுள்ள கடிதத்தில் நந்தலால் வீரசிங்கவை நீக்கி அவ்விடத்திற்கு தினேஷ் வீரக்கொடி என்பவரை நியமிக்குமாறு தெரிவிக்கப்பட்டுள்ளதாகவும் அச்செய்தியில் குறிப்பிடப்பட்டுள்ளது.

அத்துடன் தனது நிபந்தனை ஏற்றுக்கொள்ளப்படாதுவிட்டால் பொருளாதாரம் தொடர்பில் தன்னால் சிலபல முக்கிய தீர்மானங்களை எடுக்க முடியாது போகும் பட்சத்தில் தான் பிரதம மந்திரி மற்றும் நிதியமைச்சர் பதவிகளிலிருந்து ராஜனாமா செய்து கொள்ளப்போவதாக அக்கடிதத்தில் மிரட்டப்பட்டுள்ளதாகவும் அச்செய்தியில் மேலும் தெரிவிக்கப்பட்டுள்ளது. ரணில் விக்கிரமசிங்கவின் இந்த வேண்டுதலை ஜனாதிபதி முற்றாக நிராகரித்துள்ளதாகவும் எந்தவொரு நிபந்தனையிலும் தான் நந்தலால் அவர்களை பணிநீக்கம் செய்யப்போவதில்லை எனவும் கோத்தபாய திட்டவட்டமாக பதிலளித்துள்ளதாகவும் அரசியல் வட்டாரங்களை ஆதாரம்காட்டி அச்செய்தில் மேலும் கோடிட்டுக்காட்டப்பட்டுள்ளது.

நாட்டின் பொருளாதாரம் முற்றாக வீழ்ச்சியடைந்துள்ள நிலையிலும், அப்பதவியினை பாரமேற்பதற்கு பலர் அச்சம் தெரிவித்திருந்த நிலையிலும் டாக்டர் நந்தலால் வீரசிங்க அவர்கள் மந்தியவங்கியை பாரமெடுத்திருந்தார். அவர் அவ்வாறு பாரமெடுக்கும்போது விடுத்திருந்த பிரதான நிபந்தனை யாதெனில், தனது கருமங்களை முன்னெடுத்துச் செல்வதற்கு எவ்வித அரசியல் தலையீடுகளும் இருக்கக்கூடாது என்பதாகும்.

ரணில் விக்கிரமசிங்க பிரதமராக பதவியேற்று சில வாரங்களுக்கு பின்னர் ஊடகமொன்றுக்கு கருத்து தெரிவிக்கையில் தனது கருமங்களை முன்னெடுத்துச் செல்வதற்கு ஆழுநர் மற்றும் நிதியமைச்சின் செயலாளரின் பூரண ஆதரவு கிடைக்கப்பெறுவதாக தெரிவித்திருந்தார். இவ்வாறான நிலையில் தனது தீர்மானங்களை எடுப்பதற்கு நந்தலால் வீரசிங்க நீக்கப்படவேண்டும் என பிரதமர் திடீரெனத் தெரிவித்துள்ளார்.

இங்குதான் பழையகுருடி கதவை திறடி என ரணில் கதவை தட்டுகின்றாரா என்ற கேள்வி எழுகின்றது. நல்லாட்சிக்காலத்தில் அன்றைய ஜனாதிபதியான மைத்திரிபால சிறிசேனவின் ஆட்சேபனையையும் பொருட்படுத்தாது தனது நண்பனான அர்ஜூனா மகேந்திரனை மத்திய வங்கியின் ஆழுநராக நியமித்ததும் அவர் ஒரிரு மாதங்களிலேயே பிணைமுறி மூலம் சுமார் 11 மில்லியன் அமெரிக்க டொலர்களை மத்திய வங்கியிலிருந்து தனது மருமகனின் கம்பனியினூடாக திருடியதும் இடம்பெற்றது. இந்த மாபெரும் திருட்டு மோசடியே தோற்கடிக்கப்பட்ட மஹிந்த ராஜபக்சவினருக்கு மீண்டும் ஆட்சியை பிடிப்பதற்கு துரும்பாக அமைந்திருந்தது.

எனவே அரசியல் தலையீடுகளுக்கு இடமளிக்கமாட்டேன் என்ற நிபந்தனையுடன் கதிரையில் அமர்ந்த ஒருவரை நீக்கிவிட்டு ரணில் விக்கிரமசிங்க கதிரையில் அமர்த்த முன்மொழியும் தினேஷ் வீரக்கொடி என்ன நிபந்தனைகளுடன் கதிரைக்கு கொண்டுவரப்படவுள்ளார் என்பது கேட்கப்படவேண்டிய கேள்வியாகவுள்ளது.

இன்று கோப் கமிட்டியின் முன் அளிக்கப்படும் வாக்குமூலங்களில் மத்தியவங்கியில் இடம்பெற்றுள்ள சகலவிதமான முறைகேடுகளும் அம்பலமாகும் அபாயம் தெரிகையில், நந்தலாலை நீக்குமாறு ரணில் விக்கிரமசிங்க கோருவதன் நோக்கங்கள் புரிந்து கொள்ள முடியாதவையல்ல.

இலங்கையில் போர்க்குற்றங்களைப்போன்றே நிதிமோசடிக்குற்றங்களும் விசாரிக்கப்படவேண்டுமென்ற கோஷம் வலுப்பெற்றுவருகையில் விசாரணைகளில் நம்பிக்கை கொண்டுள்ள அரசியல் ஆணைகளுக்கு அடிபணிய மறுக்கும் உத்தியோகித்தர்களை பணிநீக்கம் செய்வது மீண்டும் நாட்டை பழைய மோசடி காட்டாட்சிக்கு இழுத்துச் செல்லவே என்பது தெளிவாக புரிகின்றது.

Read more...

Saturday, June 4, 2022

கோட்டாவை தூக்கி எறிந்தால் மட்டும் போதாதாம். நிறைவேற்று ஜனாதிபதி முறைமையும் நீக்கப்படவேண்டுமாம்.

இலங்கையின் ஜனாதிபதி ஆட்சி முறை சர்வாதிகார குணாதிசயங்களை கொண்ட ஜனநாயக விரோத ஆட்சிமுறையாகுமென முன்னிலை சோசலிஸ கட்சியின் தலைவர் குமார் குணரட்ணம் தெரிவித்துள்ளார். டேய்லிமிரர் பத்திரிகைக்கு அவர் வழங்கியுள்ள நேர்காணலில் மேற்கண்டவாறு தெரிவித்துள்ளதுடன் ஒரு புதிய அரசியலமைப்பு தேவை என்றும், அது மக்கள் நட்புடன் இருக்க வேண்டும் என்றும், நிறைவேற்று அதிகாரம் கொண்ட ஜனாதிபதி முறைமையை ஒழிப்பதற்கான ஏற்பாடுகள் அதில் இருக்க வேண்டும் தெரிவித்துள்ளார்.

கேள்வி: புதிய பிரதமர் நியமனத்திற்குப் பிறகு போராட்டம் சற்று மழுங்கியதாகத் தெரிகிறது. உங்கள் அடுத்த கட்ட செயற்பாடு என்ன?

பதில்: இதுவரை நடத்தப்பட்ட போராட்டத்தின் விளைவாக ராஜபக்சே ஆட்சி ஒரு படி பின்வாங்க வேண்டியதாயிற்று. ஆம் போராட்டம் சில முடிவுகளைத் தந்துள்ளது. இருப்பினும் அதன் இறுதி இலக்கு அடையப்படும்வரை நாம் அதை முன்னெடுத்துச் சென்றாக வேண்டும்.
முன்னிலை சோசலிசக் கட்சி என்ற வகையில் இறுதி இலக்கை அடையும்வரை நாம் அதை முன்னெடுத்துச் செல்ல வேண்டும் என்று நம்புகிறோம். போராட்டத்தின் செயல்பாட்டில் இடையில் சில முன்னேற்றங்கள் இருக்கலாம். இருப்பினும் இறுதியில் சோசலிசத்தை உணரும் வரை இது ஒரு பயணம். ராஜபக்ச ஆட்சியை முடிவுக்குக் கொண்டு வந்து தற்போதைய பொருளாதாரப் படுகுழியில் இருந்து நாட்டை மீட்டெடுக்க எண்ணியுள்ளோம்.

ஜனாதிபதி கோட்டாபய ராஜபக்சவை பதவி நீக்கம் செய்வது போதாது. நிறைவேற்று ஜனாதிபதி முறைமை நீக்கப்பட வேண்டும். தற்போதைய நெருக்கடிக்கு ஜனாதிபதி ராஜபக்சவே பெருமளவு பொறுப்பேற்க வேண்டும். ஆனால் இது ஜனாதிபதி ஜே.ஆர்.ஜெயவர்தனாவிலிருந்து தற்போதைய ஜனாதிபதி வரை நீண்ட காலமாக இழுக்கப்பட்ட செயல்முறையின் நெருக்கடியாகும். இது சர்வாதிகார குணாதிசயங்களைக் கொண்ட ஜனநாயக விரோத அரசியலமைப்பாகும்.
இந்த போராட்டத்தின் ஒரு நோக்கம் நிறைவேற்று அதிகாரம் கொண்ட ஜனாதிபதி முறைமையை நீக்குவது. அது நடக்க வேண்டும். மற்றபடி இது 21வது திருத்தம் அல்லது 21வது திருத்தக் கூட்டல் என்ற துண்டு துண்டான அணுகுமுறை அல்ல. தற்போதைய அரசியலமைப்பு அத்தகைய கடுமையான மாற்றங்களுக்கு வழிவகுக்கவில்லை என்றால் அவற்றைக் கொண்டுவருவதற்கு பொதுவாக்கெடுப்பு மூலம் மக்களின் ஒப்புதலைப் பெற வேண்டும். பொது அங்கீகாரம் கிடைத்தவுடன் அத்தகைய முன்மொழிவுகள் ஏற்றுக்கொள்ளப்படும் உத்தேச புதிய அரசியலமைப்பில் இணைக்கப்பட வேண்டும். அது முடிந்ததும் அடுத்த நகர்வை தொடரலாம்.

திரு ரணில் விக்கிரமசிங்கே இப்போது பிரதமர் பதவியை எங்கள் பார்வையில் இரண்டு அம்சங்களுடன் கைப்பற்றியுள்ளார் - ஜனாதிபதி ராஜபக்ஷவைப் பாதுகாப்பது மற்றும் போராட்டத்தை முடக்குவது.
கோட்டாபய - ரணில் கூட்டணியால் தற்போதைய நெருக்கடிக்கு தீர்வு காண முடியாது. மாறாக இந்த கூட்டணி நிலைமையை இன்னும் மோசமாகிவிடும். நிறைவேற்று அதிகாரம் கொண்ட ஜனாதிபதி முறைமையை ஒழிக்கும் செயற்பாட்டை திரு விக்ரமசிங்க சீர்குலைக்க முயற்சிக்கிறார். இப்போது பொருளாதார நெருக்கடியின் ஆழத்தைப் பற்றி மட்டுமே பேசுகிறார். அதற்கான தீர்வுகள் அவரிடம் இல்லை.

கோட்டா - ரணில் புனிதமற்ற கூட்டணியை வீட்டுக்கு அனுப்ப வேண்டும் என்று வலியுறுத்துகிறோம்.
அதன் பிறகு யாரேனும் தற்காலிக அரசு அமைத்தால் நாடாளுமன்றத்திற்கு வெளியே போராட்டம் நடத்தும் மக்களுடன் புரிந்துணர்வை ஏற்படுத்த வேண்டும். அது ஒரு புதிய ஜனநாயக மக்கள் நட்பு அரசியலமைப்பை உருவாக்குவது. நிறைவேற்று அதிகாரம் கொண்ட ஜனாதிபதி முறைமையை இல்லாதொழிக்கும் அரசியலமைப்பிற்கு பொது அங்கீகாரம் பெறுவதற்கு பொதுவாக்கெடுப்பு நடத்தப்பட வேண்டும். மக்களால் தேர்ந்தெடுக்கப்பட்ட பிரதிநிதிகளை திரும்ப அழைப்பதற்கான ஏற்பாடுகள் அதில் இருக்க வேண்டும். மேலும் மக்கள் வாக்கெடுப்பு நடத்துவதற்கும் இடமளிக்க வேண்டும்.

மிகவும் சிக்கலானதாகிவிட்ட தேசியப் பிரச்சினை தீர்க்கப்பட வேண்டும். இப்போதைய மக்கள் கிளர்ச்சி நீண்ட காலத்திற்கு நீடிக்க வேண்டும். இது காலி முகத்திடலில் மட்டும் நின்றுவிடக் கூடாது. இது நாடு முழுவதும் பரவி நீண்ட காலத்திற்கு நிலைத்திருக்க வேண்டும். அப்போதுதான் அதிகார மையங்களுக்கு சவால் விட முடியும்.

கேள்வி: ஆனால் புதிய பிரதமர் பதவியேற்ற பிறகு சில தொழிற்சங்கங்கள் போராட்டத்தில் இருந்து பின்வாங்கியுள்ளன. மற்றவர்கள் ஒத்துழைக்காதபோது எப்படி நீண்ட போராட்டத்தை நடத்த முடியும்?

பதில்: போராட்டம் சில தடைகளை சந்தித்துள்ளது. இந்த நாட்டின் அரசியல் கட்சிகளும் சக்திகளும் ஒரு பொதுவான நோக்கத்துடன் இயங்கவில்லை. அவர்களிடம் வேறு அரசியல் நிகழ்ச்சி நிரல் உள்ளது. மக்கள் சக்தி (SJB) தனியாக உள்ளது. மற்ற கட்சிகள் அவ்வாறு தனியாகதான் இருக்கின்றன. சிறீலங்கா பொதுஜன பெரமுனவினர் (SLPP) பாராளுமன்றத் தேர்தலைத் தவிர்த்து ரணில் விக்ரமசிங்கேவின் ஆதரவுடன் பதவியில் இருக்க அதிபர் கோட்டபாய ராஜபக்சே விரும்புகிறார். போதிய பாராளுமன்ற பிரதிநிதித்துவம் இல்லாத விக்ரமசிங்க பிரதமர் பதவிக்கான சலுகைகளை அனுபவிக்க விரும்புகிறார்.
விக்கிரமசிங்கவை பிரதமர் பதவியில் அமர்த்துவதில் இந்தியாவும் அமெரிக்காவும் முக்கிய பங்கு வகித்தன. அவர்கள் பதவியில் நம்பகமான விசுவாசமான கீழ்ப்படிதலுள்ள நண்பரை விரும்பினர். போராட்டத்தின் முக்கிய நோக்கம் இப்போது இங்கே சமரசம் செய்யப்படுகிறது.
இதுபோன்ற துரோகக் கூறுகளுக்கு எதிராக மக்கள் செயல்படுவார்கள் என்று நாங்கள் நம்புகிறோம். போராட்டத்தின் உண்மையான இலக்குகள் இன்னும் அடையப்படவில்லை. மக்களின் பொருளாதார நெருக்கடிக்கு இதுவரை தீர்வு காணப்படவில்லை. அரசியல் மற்றும் பொருளாதாரப் பிரச்சினைகளுக்கு குறைந்தபட்சம் இடைக்காலத் தீர்வுகள் உடனடியாக வேண்டும்.

கேள்வி: நெருக்கடியின் ஆழத்தைப் பற்றி மட்டுமே பிரதமர் பேசுகிறார் என்று சொன்னீர்கள். நெருக்கடிக்கு ஏதேனும் குறுகிய கால தீர்வு உங்களிடம் உள்ளதா?

பதில்: பிரச்சனைகள் பற்றிய அவர்களின் பேச்சுக்கும் நம்முடைய பேச்சுக்கும் வித்தியாசம் உள்ளது. அவர்களின் கண்ணோட்டத்தில் தற்போதைய சூழ்நிலையை நாங்கள் பகுப்பாய்வு செய்யவில்லை. எங்களுடையது பொதுநலன் சார்ந்த நிலைபாட்டின் அடிப்படையில் பொது ஊழியர்கள் தொழிலாளர்கள் குட்டி முதலாளிகள்; போன்ற சமூகத்தின் பரந்த பிரிவினர்களும் ஏற்றுக்கொள்ளக்கூடிய ஒரு தீர்வை நாங்கள் பார்க்கிறோம்.

நாங்கள் முதலாளித்துவத்தை நம்பவில்லை. கோவிட்-19 தொற்று நோயிலிருந்தும் லாபம் ஈட்டிய நிறுவனங்களுடன் நாங்கள் நிற்கவில்லை. தேவையற்ற லாபம் ஈட்டும் அரிசி ஆலைகளின் மாஃபியாவுடன் நாங்கள் நிற்கவில்லை. எங்கள் முன்மொழிவுகள் அவர்களுக்கான தேவையற்ற பெரிய லாப வரம்பைக் குறைப்பதை நோக்கமாகக் கொண்டுள்ளன. வருமானம் அல்லது அந்நியச் செலாவணியை எப்படிக் கொண்டு வருவது என்று எல்லோரும் கேட்கிறார்கள். இவர்களில் யார் வந்தாலும் இப்பிரச்சினைகளுக்கு ஒரு தீர்வை கொண்டு வருவது கடினம்.
ஆயினும் சாதாரண மக்களின் நலனுக்காக இந்த இலாபம் ஈட்டும் நபர்களின் தேவையற்ற வகையில் குவிக்கப்பட்ட செல்வத்தை மீட்டெடுக்காத வரை இந்த பிரச்சினைகளில் எதற்கும் தீர்வு காண முடியாது என்று நாங்கள் நம்புகிறோம்.
இத்தகைய சுழலில் விவசாயிகள் மட்டுமே நெல்லுக்கு உத்தரவாத விலையை முடிவு செய்வார்கள். அரிசி ஆலைகள் தங்கள் லாப வரம்புகளை குறைக்கலாம். வரிக் கொள்கையை மாற்ற வேண்டும். இன்று நேரடி வரிகள் 15 சதவீதமாகவும் மறைமுக வரிகள் 85 சதவீதமாகவும் உள்ளது.
நேரடி வரி விதிப்பை அதிகரிக்க வலியுறுத்தி போராட்டம் நடத்துகிறோம். சாதாரண மக்களுக்குப் பயன்படுத்தப்படும் வரி விகிதங்களைக் குறைக்கும் அதே வேளையில் வசதியான வகுப்பினருக்கும் வரி விதிக்க வேண்டும். பணக்காரர்களிடம் இருந்து கிடைக்கும் வரி வருவாயை சாதாரண மக்களுக்கு நிவாரணம் வழங்க பயன்படுத்த வேண்டும். அரச வருவாயில் 6 சதவீதம் கல்வித்துறைக்கு ஒதுக்க வேண்டும்.
சோசலிசம் நடைமுறைப்படுத்தப்பட்ட பிறகான ஒரு தீர்வாகாது இது. தற்போதைய முதலாளித்துவ முறையிலும் இது ஒரு தீர்வாகும். முதலாளித்துவ வர்க்கம் தடையின்றி செல்வத்தை குவிக்கும் போது தீர்வு காண்பது கடினம். அதனால் போராட்டம் தொடர வேண்டும். காலி முகத்திடலின் எல்லையைத் தாண்டி ஒவ்வொரு நகரம் கிராமம் மற்றும் பணிவிடங்களை சென்றடையும் வகையில் போராட்டம் விரிவுபடுத்தப்பட வேண்டும்.
மக்கள் 24 மணி நேரமும் தயாராக இருக்க வேண்டும். இது எல்லா நேரத்திலும் அவர்கள் உயரமான கொடிகள் மற்றும் பதாகைகளை ஏந்தியபடி தெருவில் அணிதிரள்வது என்று அர்த்தமல்ல. அதற்குப் பதிலாக தேவைப்படும்போது ஆட்சியாளர்களை அப்புறப்படுத்த அவர்கள் நிறுவன அதிகாரத்துடன் தயாராக இருக்க வேண்டும்.
பிரதிநிதித்துவ ஜனநாயகக் கொள்கைகளின்படி ஆட்சியாளர்களை மாற்ற ஐந்து ஆண்டுகள் மக்கள் காத்திருக்காமல் ஆண்டின் எந்த நேரத்திலும் இத்தகைய பொது அமைப்புக்கு அதிகாரம் இருக்க வேண்டும்.

கேள்வி: சோவியத் ரஷ்யாவின் போல்ஷிவிக் புரட்சி போன்ற போராட்டத்தின் மூலம் அதிகாரத்தைக் கைப்பற்றுவதில் நீங்கள் இன்னும் நம்புகிறீர்களா?

பதில்: புரட்சி ஒரு இனிமையான அனுபவம். ஆயினும் கூட இது மோசமான ஒன்றாக வெளிச்சம் போட்டு காட்டப்படுகின்றது மற்றும் ஒரு புத்திசாலித்தனமற்ற வன்முறை மற்றும் பேரழிவுகரமான செயற்பாடாக காட்டப்படுகிறது. ஒரு சோசலிசப் புரட்சியை விட இனிமையான எதையும் இந்த கிரகத்தில் உள்ள மனிதர்கள் அனுபவிக்க முடியும் என்று நான் நம்பவில்லை.
இலங்கையிலும் உலகிலும் சோசலிசத்தை நிலைநாட்டும் ஒரே நோக்கத்துடன் நாம் ஜே.வி.பியுடன் அரசியலை ஆரம்பித்து பின்னர் முன்னிலை சோசலிசக் கட்சியை உருவாக்கினோம். இந்த உன்னத இலக்கிலிருந்து நாங்கள் விலகவில்லை. இலங்கையில் 45 வருடகால திறந்த சந்தைப் பொருளாதாரம் எவ்வளவு தோல்வியடைந்துள்ளது என்பதை இப்போது நாம் காண்கிறோம். நாங்கள் கடன்களை சுமந்து வாழ்ந்து வருகிறோம். இன்று உண்பதற்கு உணவின்றி தவிக்கிறோம். நாடு கடனில் ஆழ்ந்துள்ளது. உணவுக் கலவரங்கள் கண்டிப்பாக நடக்கும். உரம் இல்லாததால் பயிர்களை விளைவிக்க இயலாது போகும். இது நிஜம்.
தேசியப் பொருளாதாரத்தை அதிகபட்ச சாத்தியமான அளவிற்கு வலுப்படுத்துவதிலேயே தீர்வு உள்ளது. அந்த வலிமையின் அடிப்படையில் உலகின் பிற நாடுகளுடன் நாம் பரிவர்த்தனை செய்ய வேண்டும்.

கேள்வி: முழு உலகமும் சோசலிசத்தை முழுமையாக அறிமுகப்படுத்துவதில் தோல்வியடைந்துள்ளது. அது எப்படி இலங்கையில் உண்மையாக இருக்க முடியும்?

பதில்: உலகம் என்று சொன்னால் இன்று அமெரிக்கா மற்றும் ஐரோப்பாவின் வல்லமை என்று அர்த்தம். இது அவர்களின் இராணுவ மற்றும் பொருளாதார வலிமையைக் குறிக்கிறது. இல்லையெனில் அது வால் ஸ்ட்ரீட்டின் சக்தி. ஆனால் என்னைப் பொறுத்தவரை உலகம் என்பது பெரும்பான்மையான உலக மக்கள் தொகையைக் குறிக்கிறது. ஏனெனில் அவர்களுக்கு சமூக நீதி வேண்டும். இன்று உக்ரைனில் போரினால் ஏற்பட்ட அழிவை நாம் காண்கிறோம்.
அமெரிக்க ஏகாதிபத்தியம் ஆபத்தில் உள்ளது. தொற்றுநோய் இருந்தபோதிலும் உலகின் தலைசிறந்த பில்லியனர்களின் செல்வம் அதிவேகமாக அதிகரித்துள்ளது. கோவிட் காலத்தில் மட்டும் முதல் பத்து பில்லியனர்களின் சொத்து மதிப்பு 540 பில்லியன் அமெரிக்க டாலர்கள் அதிகரித்துள்ளது.

உலகின் பிற பகுதிகள் உயிர் பொருளாதார மற்றும் வேலை இழப்பு ஆகியவற்றால் பாதிக்கப்படும் போது இவர்கள் பெரும் லாபம் பெற்றுள்ளனர். அதுதான் முதலாளித்துவம். இது உலகத்திற்கே ஆபத்தாக உள்ளது. இதனால் தொற்றுநோய்க்கு கூட பதிலளிக்க முடியாது. தற்போது சோசலிசம் நடைமுறையில் உள்ளதா என்று கேட்டீர்கள். அப்படியானால் தற்போதைய நடைமுறையில் உள்ள முறைமை சரியாக உள்ளதா? அது மனித நேயத்திற்கு ஒத்து வருமா? மக்களின் பொருளாதார நெருக்கடிகளுக்கு தீர்வு தருகிறதா?
உலகில் 7.5 பில்லியன் மக்கள் உள்ளனர் அவர்களில் பெரும்பாலோருக்கு சிறந்த சமூக நீதி தேவைப்படுகிறது. அவர்களுக்கு நீதி கிடைக்கும் வரை போராட்டம் தொடரும். போராட்டத்தில் ஏற்ற தாழ்வுகள் உண்டு. இது தடையில்லாத மேல் நோக்கிய பயணம் அல்ல. 1917ல் சோவியத் ரஷ்யா தனி சோசலிச நாடாக உருவானது. பின்னர் அது உலகம் முழுவதும் சோசலிச நாடுகளின் குழுவின் தோற்றத்திற்கு வழிவகுத்தது. அது பின்னர் சரிந்தது. அதற்கு காரணங்கள் உண்டு. மீண்டும் ஒருமுறை சோசலிசத்திற்கான ஆதரவு அலை உலகம் முழுவதும் எழுகிறது.
இலங்கையில் பாராளுமன்றத்திற்கு வெளியே கட்டியெழுப்பப்பட்டுள்ள மக்கள் போராட்ட சக்தி இன்று எம் முன்னால் உள்ள நேரடி உதாரணம். இந்த அதிகாரம் அரசியலமைப்பின் அளவுருக்களுக்குப் புறம்பாக மக்கள் சக்தி பலம் பொருந்தியதாக கட்டமைக்கப்பட்டதால் திரு மஹிந்த ராஜபக்ஷ இந்தியாவுக்கு அருகில் உள்ள கடற்படைத் தளத்தில் தப்பி ஓடி ஒளிந்து கொள்ள வேண்டியிருந்தது. இந்த மக்கள் சக்தியின் பலம் தான் அமைச்சரவையை ராஜினாமா செய்ய வழிவகுத்தது. இந்த மக்கள் பலமே 21வது திருத்தச் சட்டத்தை குறைந்தபட்சம் பெயரிற்காவது பரிசீலிக்குமாறு அரசாங்கத்தை நிர்ப்பந்தித்தது. இது நடைமுறையில் நிரூபிக்கப்பட்ட சக்தி. கேள்வி கேட்பதற்கு ஒன்றுமில்லை.
நடைமுறையிலுள்ள சட்ட மற்றும் நீதித்துறை செயல்முறை மூலம் சாத்தியமற்றதாக இருந்த ஒரு விடயம் மக்களின் பலத்தின் அதிகாரத்தால் அடையப்பட்டது. இந்த அதிகாரத்தை நீண்ட காலத்திற்கு நிலைநிறுத்துவதற்கு நாங்கள் இப்போது முயற்சி செய்கிறோம். பாராளுமன்ற அதிகாரத்தை நம்பியிருப்பது அல்லது கூக்குரலிடுவதற்குப் பதிலாக மக்கள் குறைகளைத் தீர்ப்பதற்கு இதைத்தான் நாங்கள் முன்மொழிந்தோம். சோசலிசத்தை அடையும் வரை இந்தப் போராட்டத்தை முன்னெடுத்துச் செல்வோம். உலகில் வெற்றியுடன் முடிந்த மற்ற போராட்டங்களின் பொறிகளை தற்போதைய போராட்டம் கொண்டுள்ளது. அந்த வகையில் இது ஒரு புதுமையான போராட்டம் அல்ல.
சோசலிசத்தை வெல்வதற்கான எந்தவொரு புதுமையான மாதிரியையும் உலகிற்கு அறிமுகப்படுத்த ஒரு கணம் கூட தயங்க மாட்டோம். அதை உலகிற்கு எடுத்துச் செல்ல நாங்கள் எதற்கும் பின்வாங்கமாட்டோம்.

கேள்வி: அத்தகைய வெற்றியில் நீங்கள் உறுதியாக இருக்கிறீர்களா?

பதில்: தோழர் விளாடிமிர் லெனின் கூறியதை என்னால் தொடர்புபடுத்த முடியும். அவர் கூறினார் "எதுவும் நடக்காத பல தசாப்தங்கள் உள்ளன. பல பத்தாண்டுகள் நடக்கும் வாரங்களும் உள்ளன". பல பத்தாண்டுகள் நடக்கும் வாரங்கள் இவை. ஏழு தசாப்தங்களாக நம் தலையில் இருந்த நிறைவேற்று அதிகாரம் கொண்ட ஜனாதிபதி முறையின் சுமை இப்போது வெடிக்கப் போகிறது. நாடாளுமன்ற அமைப்பு சீர்குலைந்து போகிறது. 225 பாராளுமன்ற உறுப்பினர்களையும் மக்கள் நிராகரிக்கின்றனர். இது எங்கள் கட்சியால் கண்டுபிடிக்கப்பட்ட கோஷம் அல்ல. இது மக்கள் மத்தியில் எழுந்த முழக்கம். தற்போதைய நாடாளுமன்ற ஆட்சிமுறையில் நமது பிரச்சினைகளுக்கு தீர்வு இல்லை என்று அர்த்தம். நாடு முழுவதும் மக்கள் போராட்ட அமைப்பு அல்லது பொதுப் போராட்ட இயக்கங்களின் மையங்கள் உருவாகி வருகின்றன. இது ஏனைய சிவில் சமூக இயக்கங்கள் மற்றும் தொழிற்சங்கங்களுடன் இணைந்து எங்களால் கட்டமைக்கப்பட்ட இயக்கமாகும். இதுவே நாம் எதிர்நோக்கும் எதிர்கால சமுதாயத்தின் கட்டுமானப் பொருள். இது அரசியலமைப்புச் சட்டத்திற்கு புறம்பாக செய்யப்பட வேண்டிய ஒன்று.

கேள்வி: ஜே.வி.பி இந்தப் போராட்டத்தை ஆதரிக்கும் மற்றொரு அரசியல் கட்சியாகும். ஜேவிபியுடன் இணைந்து செயற்பட தயாரா?

பதில்: நிச்சயமாக நாம் ஜேவிபியுடன் இணைந்து செயற்பட வேண்டும். இந்த இலக்கை அடைய இரு கட்சிகளும் ஒன்று சேரலாம். மக்கள் நிகழ்ச்சி நிரலுக்கு வெற்றியை உறுதி செய்வதற்காக முதலில் எங்களுடன் இணைந்து கொள்ள யாராவது இருந்தால் அது ஜே.வி.பியைத் தவிர வேறில்லை.

கேள்வி: ஜே.வி.பி.க்கும் உங்கள் கட்சிக்கும் இடையிலான கருத்து வேறுபாடுகள் காரணமாக அதற்கான சாத்தியக்கூறுகள் உள்ளதா?

பதில்: சாத்தியம் இருப்பதாக நாங்கள் நம்புகிறோம். ஜே.வி.பி.யுடன் ஒரு சந்திப்பை நடத்தி எங்கள் முன்மொழிவுகள் குறித்து விவாதிக்க முயற்சித்துள்ளோம். மற்ற கட்சிகளிடமும் அதைத்தான் செய்தோம்.
காலிமுகத்திடல் போராட்ட களத்திலும் நாம் ஜே.வி.பியின் இளைஞர் செயற்பாட்டாளர்களுடன் இணைந்து செயற்படுகின்றோம்.

கேள்வி: ஜே.வி.பி.யின் செயற்பாடு உங்களுக்கு பிடிக்காத காரணத்தினால் நீங்கள் அதிலிருந்து விலகிச் சென்றீர்கள் அல்லவா?

பதில்: ஜே.வி.பி.யும் எமக்கும் இடையே அரசியல் பாதைகளில் வேறுபாடுகள் உள்ளன. அதில் நாங்கள் தெளிவாக இருக்கிறோம். எங்களுடையது சோசலிசத்தின் சாதனையை இலக்காகக் கொண்ட இயக்கம். இருப்பினும் இந்த சரியான நேரத்தில் அனைத்து முற்போக்கு இடதுசாரி சார்பு மக்கள் சார்ந்த அரசியல் கட்சிகள் அல்லது இயக்கங்கள் வேறுபாடுகள் பொருட்படுத்தாமல் ஒன்றிணைந்து செயல்பட வேண்டும் என்று நாங்கள் நம்புகிறோம். அந்தச் சுழலில் ஜே.வி.பி.யுடன் நாம் இணைந்து செய்வதற்கு நிறைய இருக்கிறது.

கேள்வி: தேசியப் பிரச்சினைக்கான தீர்வு பற்றி நீங்கள் பேசினீர்கள். முன்னதாக ஜே.வி.பி.யின் ஸ்தாபகத் தலைவர் ரோஹன விஜேவீர பொருளாதார சமத்துவத்தின் அடிப்படையிலான தீர்வை முன்வைத்தார். ஆனால் வடக்கு கிழக்குத் தேர்தல் தொகுதிகளைப் பிரதிநிதித்துவப்படுத்தும் தமிழ்க் கட்சிகள் அதிகாரப் பகிர்வு அல்லது பகிர்வைக் கேட்கின்றன. அத்தகைய தீர்வை நீங்கள் ஒப்புக்கொள்கிறீர்களா?

பதில்: எங்களுக்கு ஒரு புதிய அரசியலமைப்பு தேவை. அது மக்கள் நட்புடன் இருக்க வேண்டும். நிறைவேற்று அதிகாரம் கொண்ட ஜனாதிபதி முறைமையை ஒழிப்பதற்கான ஏற்பாடுகள் அதில் இருக்க வேண்டும். இது திரும்ப அழைக்கும் உரிமை மற்றும் நீதித்துறை மதிப்பாய்வுகளை வழங்க வேண்டும். தேசிய பிரச்சினைக்கு நிலையான தீர்வு காணப்பட வேண்டும். துன்புறுத்தலைத் தடுப்பதற்கான சட்டப்பூர்வ விதிகள் மற்றும் அதற்கான நடைமுறை அணுகுமுறையும் இருக்க வேண்டும்.
இனவாதம் தடை செய்யப்பட வேண்டும். அதற்கு சட்டங்கள் மற்றும் ஒழுங்குமுறைகள் செயல்படுத்தப்பட வேண்டும். தேசிய நல்லிணக்கத்திற்கு தடையாக இருக்க முடியாது. பொருளாதார மற்றும் அபிவிருத்தி நடவடிக்கைகளில் இனரீதியாக உந்தப்பட்ட கட்டுப்பாடுகள் நீக்கப்பட வேண்டும்.
ஒருவரது மொழி அல்லது மத அடையாளத்தின் அடிப்படையில் யாரும் பாகுபாடு காட்ட முடியாது. அனைத்து முக்கிய மொழிகளும் நாட்டின் அலுவல் மொழிகளாக அங்கீகரிக்கப்பட வேண்டும். நாட்டில் உள்ள எந்த ஒரு அரசு நிறுவனத்திலும் ஒருவர் விரும்பும் மொழியில் பணிபுரிய அனுமதிக்கப்பட வேண்டும். நாட்டில் எங்கு வேண்டுமானாலும் நிலம் வாங்க யாருக்கும் உரிமை உண்டு. இவை அனைத்தும் அரசியலமைப்புச் சட்டத்தில் இடம் பெற வேண்டும். வெறும் அரசியலமைப்பு விதிகள் மட்டும் போதாது. நடைமுறை அர்த்தத்தில் அவற்றைத் தீர்க்க காலக்கெடுவுக்கான செயல்திட்டம் தேவை.
இலங்கை ஒரு தீவு அது ஒரே நாடாக இருக்க வேண்டும். இது உலகின் பிற பகுதிகளுடன் இணைக்கப்பட வேண்டும். அதற்கு மையப்படுத்தப்பட்ட பொருளாதாரமும் நிர்வாகமும் தேவை. அனைத்து இன மற்றும் மொழிவாரி மக்களுக்கும் பொருளாதார பலன்களைப் பெறுவதற்கான பொறிமுறையொன்று உருவாக்கப்பட வேண்டும். அப்போது தான் இலங்கை தேசத்தை பொருளாதார ரீதியாக மட்டுமன்றி சமூகவியல் ரீதியாகவும் உருவாக்க முடியும். எவரும் இலங்கையர் என்பதில் பெருமை கொள்ள வேண்டும். இருப்பினும் சில இனக்குழுக்கள் தங்கள் சொந்த அடையாளங்களின் வளர்ச்சியில் நம்பிக்கை கொண்டால் சுயராஜ்யத்தின் அலகுகள் பற்றி நாம் சிந்திக்கலாம். இது சிங்கள அல்லது தமிழ் அடையாளங்களை மட்டும் அடிப்படையாகக் கொண்டதல்ல. கருத்தில் கொள்ள வேண்டிய மற்ற விஷயங்கள் உள்ளன.

கேள்வி: அந்த சுய ஆட்சி என்பது ஒரு கூட்டாட்சி கட்டமைப்பிற்குள் உள்ள அமைப்பைக் குறிக்குமா?

பதில்: அன்று தமிழீழத்திற்காக நின்றவர்கள் நிறைய பேர் இன்று அந்த சித்தாந்தத்தை கைவிட்டுள்ளனர். நாடு முழுவதுக்கும் பொதுவான பொருளாதாரப் பிரச்சனைக்காக வெவ்வேறு இன மத மற்றும் கலாசாரக் குழுக்கள் எவ்வாறு இலங்கையர்களாக தமது சொந்த அடையாளங்களைப் பாதுகாத்துக் கொண்டு இணைந்து போராட முடியும் என்பதைப் பார்க்கிறோம்.
ஒரு சோசலிச கட்டமைப்பில் இந்த பிரச்சினைக்கு ஒரு தீர்வை நாங்கள் நினைக்கிறோம். ஆனால் அரசியல் ரீதியாக தூண்டப்பட்ட இனவாதம் தடையின்றி செல்லும் தற்போதைய அமைப்பில் இதற்கு தீர்வு இல்லை.

கேள்வி: உங்கள் கட்சி தமிழ் தேசிய கூட்டமைப்புடன் (TNA) பேச்சுவார்த்தை நடத்தியது. முடிவு என்ன?

பதில்: தமிழ்த் தேசியக் கூட்டமைப்பு மக்கள் நட்பு அரசியலமைப்பை ஏற்றுக்கொள்கிறது. இது பாராளுமன்றத்திற்கு வெளியே உருவாக்கப்பட வேண்டும். இது நிறைவேற்று அதிகாரம் கொண்ட ஜனாதிபதி முறை இல்லாத அரசியலமைப்பாகும். இது மக்கள் தங்கள் எம்.பி.க்களை திரும்ப அழைக்கவும், நீதித்துறை மறுஆய்வு செய்யவும் அதிகாரம் அளிக்கிறது. பொதுவாக்கெடுப்பு நடத்துவதற்கு மக்களுக்கு உரிமை உண்டு. இது இனவெறி மற்றும் துன்புறுத்தலைத் தடுக்கும் அரசியலமைப்பாகும்.

கேள்வி: புலம்பெயர் தமிழ் மக்களிடம் இருந்து நீங்கள் நிதி உதவி பெறுவதாக ஒரு குற்றச்சாட்டு உள்ளது. உங்கள் பதில் என்ன?

பதில்: 'டயஸ்போரா' என்ற வார்த்தை அதன் மொழியியல் அர்த்தத்தை விட மேலான ஒன்றைக் குறிக்கிறது. இது இன்று சமூகத்தில் ஒரு அரசியல் அர்த்தத்தைக் குறிக்கிறது. பொதுப் பொருளில் புலம்பெயர் என்றால் நாட்டிற்கு வெளியே வாழும் இலங்கையர்கள் என்று பொருள். சிங்கள தமிழ் மற்றும் முஸ்லிம் புலம்பெயர்ந்தோர் உள்ளனர். மூன்று குழுக்களிலும் இனம் சார்ந்த அரசியல் நாட்டிலும் வெளியிலும் காணப்படுகிறது. அதே சமயம் வெளிநாட்டில் இருந்து புதிய முற்போக்கு சக்திகள் வெளிவருகின்றன. இன எல்லைகளுக்கு அப்பால் சிந்திக்கவும் அனைத்து இலங்கையர்களுடனும் ஈடுபடவும் நாங்கள் விரும்புகிறோம். அனைவரிடமிருந்தும் உதவி பெறுகிறோம். இந்தப் போராட்டம் தொடர வேண்டும் என்று விரும்புகிறோம்.

முற்றும்


Read more...

Monday, May 16, 2022

மக்களுக்கு உண்மைகளை மறைக்க விரும்பவில்லை. பயங்கரமாகவும் அசிங்கமாகவும் இருந்தாலும் இதோ உண்மைகள். ரணில்

புதிய பிரதமாராக கடந்த வியாழக்கிழமை 6 வது தடவையாக பதவியேற்ற ரணில் விக்கிரமசிங்க இன்று நாட்டு மக்களுக்கு உரையாற்றியபோது, நாட்டின் பொருளாதார நிலைமை தொடர்பாக இத்தனை காலமும் மறைக்கப்பட்டுவந்த பல உண்மைகளை மக்கள் முன்வைத்துடன், நாம் குறுகிய காலத்திற்கு கடந்த காலத்தைவிட பலத்த இன்னல்களுக்கு முகம் கொடுக்கப்போகின்றோம் என்பதை வெளிப்படையாக தெரிவித்துள்ளார்:

புதிய பிரதமரின் உரையின் முழுவடிவம் :

கடந்த வியாழக்கிழமை நான் பிரதமர் பதவியை பொறுப்பேற்றேன்.அந்தப் பதவியை நான் கேட்கவில்லை. நாட்டில் ஏற்பட்டிருந்த நெருக்கடி நிலையை கருத்தில் கொண்டு இந்தப் பதவியை ஏற்றுக்கொள்ளுமாறு ஜனாதிபதி எனக்கு அழைப்பு விடுத்தார். நான் அரசியல் தலைவராக மட்டுமின்றி இலவசக் கல்வியை அனுபவித்து கொழும்பு சட்டக் கல்லூரியில் சட்டத்துறையில் பட்டம் பெற்று உயர்ந்த தேசியத் தலைவர் என்ற வகையிலே இந்தப் பொறுப்பை ஏற்றுக் கொண்டேன்.

இந்தச் சந்தர்ப்பத்தில் இலங்கையின் பொருளாதாரம் மிகவும் மோசமான நிலையிலேயே உள்ளது.2022 ஆரம்பத்தில் கடந்த அரசாங்கத்தின் வரவுசெலவு திட்டத்தில் 2.3 ட்ரில்லியன் ரூபாய்கள் வருமானமாக உள்ளன என காட்டப்பட்டாலும் இந்த வருடத்திற்கான உண்மையான வருமான எதிர்வு கூறல் 1.6 ட்ரில்லியன் ரூபாய்களாகவே உள்ளன..

2022 ஆம் ஆண்டிற்கான அரசின் செலவு 3.3 ட்ரில்லியன் ரூபாய்கள். எவ்வாறாயினும் கடந்த அரசில் வட்டி விகிதம் அதிகரித்தமை மற்றும் மேலதிக செலவுகள் காரணமாக 2022 ஆம் ஆண்டிற்கான அரசின் மொத்த செலவு 4 ட்ரில்லியன் ரூபாய்களாகும். வருடத்திற்கான வரவுசெலவு பற்றாக்குறை 2.4 ட்ரில்லியன் ரூபாய்களாக உள்ள அதேவேளை அது சராசரி தேசிய உற்பத்தியில் நூற்றுக்கு 13 வீதமாகும் .

அதேப் போன்று அங்கீகரிக்கப்பட்ட கடன் எல்லை 3200 பில்லியன் ரூபாயாகும் . நாம் மே மாதத்தின் இரண்டாம் வாரம் ஆகும்போது 1950 பில்லியன் ரூபாய்களை செலவு செய்திருந்தோம். அதன்படி அண்ணளவான மிகுதி 1250 பில்லியன் ரூபாய்கள். நாம் நேற்று அமைச்சரவையில் திறைசேரி முறிகளை வழங்கும் அனுமதிக்கப்பட்ட எல்லையை 3000 பில்லியனில் இருந்து 4000 பில்லியன் வரை அதிகரிக்கும் யோசனை ஒன்றை பாராளுமன்றத்தில் முன்வைக்க ஒரு தீர்மானத்தை எடுத்தோம்.

2019 நவம்பர் மாதத்தில் எமது அந்நியச் செலாவணி கையிருப்பு 7.5 பில்லியன் அமெரிக்க டொலர்கள் இருந்தன. ஆனால் இன்று திறைசேரியால் ஒரு மில்லியன் டொலர்களைக்கூட தேடிக்கொள்ள முடியாத நிலை ஏற்பட்டுள்ளது. எரிவாயுவை கப்பலில் ஏற்றும் பொருட்டு செலுத்தத் தேவையான 5 மில்லியன் அமெரிக்க டொலர்களைக்கூட இந்த நேரத்தில் நிதியமைச்சினால் தேடிக்கொடுக்க முடியாதுள்ளது.

இவ்வனைத்து நெருக்கடிகளுக்கு மத்தியில் நாம் முகம் கொடுக்கும் மிகமோசமான சில சிக்கல்கள் உள்ளன. எதிர்வரும் சிலநாட்களில் வரிசைகளை கட்டுப்படுத்தும் பொருட்டு மிகவிரைவில் சுமார் 75 மில்லியன் அமெரிக்க டொலர்களை தேடவேண்டிய உள்ளது. இப்போது நமது கையிருப்பில் ஒரு நாளைக்குத் தேவையான பெற்றோல் மட்டுமே உள்ளது. நேற்று வந்த டீசல் கப்பலால் இன்றில் இருந்து உங்களின் டீசல் பிரச்சினைக்கு ஓரளவு தீர்வு கிடைக்கும். இந்திய கடனுதவி திட்டத்தின் கீழ் மே 19 மற்றும் ஜூன் 01 ஆகிய திகதிகளில் மேலும் இரண்டு டீசல் கப்பல்களும் மே 18 மற்றும் மே 29 இரண்டு பெற்றோல் கப்பல்கள் வரவுள்ளன. இன்றுவரை 40 நாட்களுக்கு மேலாக இலங்கையின் கடற்பரப்பில் பெற்றோல், மசகெண்ணெய் , ஏற்றி வந்த கப்பல்கள் 3 நிறுத்தி வைக்கப்பட்டுள்ளன. அவற்றுக்கு செலுத்தும் பொருட்டு திறந்த சந்தையில் டொலர்களை பெற்றுக் கொள்ள நடவடிக்கை எடுக்கப்படும்.

மின்சாரத் தேவையில் நான்கில் ஒன்றை உற்பத்தி செய்ய எரிபொருளே பயன்படுத்தப்படுகிறது. இதனால் நாளாந்த மின்வெட்டு இன்னும் சில நாட்களில் 15 மணித்தியாலங்களாக மாறவும் இடமுண்டு. ஆனால் நாம் இதற்கு தேவையான நிதியை தேடிக்கொண்டுள்ளோம் . அதேபோன்று முடிந்தளவு நுகர்வோருக்கு எரிவாயுவை பெற்றுக் கொடுக்கும் பொருட்டு 20 மில்லியன் அமெரிக்க டொலர்களை கூடிய விரைவில் தேடவேண்டும். மண்ணெண்ணெய் மற்றும் சம்பந்தமான நிலைமை இதனை விடப் பயங்கரமானது. இந்த நேரம் வரை இலங்கை மத்திய வங்கி, அரச வங்கிகள், தனியார் வங்கிகள் , இலங்கையில் உள்ள வெளிநாட்டு வங்கிகள் அனைத்தும் டொலர் இல்லாத சிக்கலுக்கு முகம் கொடுத்துள்ளன. நம்மிடம் கையிருப்பில் உள்ள டொலர்களின் அளவு மிகவும் சிறியது என்பதை நீங்கள் அறிவீர்கள். ஆனால் இவ்வனைத்து சிரமங்களுக்கு மத்தியில் நேற்று ஒரு டீசல் ஏற்றிய கப்பலை நேற்று கொண்டு வந்தோம். அதனால் இன்று முதல் அந்த டீசலை உங்களால் பெற்றுக்கொள்ள முடியும். அதன்பொருட்டு இந்தியாவின் ஒத்துழைப்பு நமக்கு கிடைத்தது. அதேப் போன்று வந்துள்ள எரிவாயு கப்பலுக்கான கட்டணத்தை செவ்வாய்க்கிழமைக்கு முன்னர் செலுத்த நாம் நடவடிக்கை எடுப்போம். அதன் மூலம் உங்களின் எரிவாயு பிரச்சனைகளுக்கு ஏதோவொரு தீர்வு கிடைக்கும்.

இதற்கு இடையில் , மற்றுமொரு உதாரணம் மருத்துவ மருந்துகளுக்கானத் தட்டுப்பாடு. இருதய நோயாளிகளுக்குத் தேவையான மருந்துகள், சத்திர சிகிச்சைக்குத் தேவையான சிகிச்சை உபகரணங்கள் உட்பட பல மருத்துவ மருந்து வகைகளுக்கான தட்டுப்பாடு நிலவுகிறது. மருத்துவ மருந்துகள், சத்திர சிகிச்சை உபகரணங்கள் மற்றும் தேவையான உணவுகளை வழங்கும் வழங்குநர்களுக்கு 04 மாதங்களாக கட்டணம் செலுத்தப்படவில்லை. அவர்களுக்கு வழங்கவேண்டிய நிலுவை தொகை 34 பில்லியன் ரூபாய்களாகும். அதேப் போன்று அரச ஔடதக் கூட்டுத்தாபனம் இறக்குமதி செய்த மருத்துவ மருந்துகளுக்கு 04 மாதங்களாக கட்டணம் செலுத்தப்படவில்லை. அதனால் அவர்களை கருப்புப் பட்டியலில் சேர்க்க வெளிநாட்டு மருத்துவ நிறுவனங்கள் நடவடிக்கை எடுத்து வருகின்றன. 14 அத்தியாவசிய மருத்துவ மருந்துகள் தட்டுப்பாடாக உள்ளமையும், அதில் இரண்டையாவது வழங்க இந்த நேரத்தில் எமது மருத்துவ வழங்கள் பிரிவிற்கு இயலாது உள்ளமை மிகவும் வருந்தத்தக்க விடயமாக உள்ளது. இருதய நோய்களுக்கு பயன்படுத்தப்படும் மருந்து, மற்றும் விசர் நாய்க்கடி எதிர்ப்பு மருந்து ஆகியவையே அந்த இரண்டு மருந்துகளாகும். ஆனால் விசர் நாய்க்கடி எதிர்ப்பு மருந்திற்க்கு மாற்று மருந்து எதுவும் இல்லை.

இதற்கிடையில் 2022 ஆண்டிற்காக முன்வைக்கப்பட்ட அபிவிருத்தி வரவுசெலவு திட்டத்திற்கு பதிலாக புதிய வரவுசெலவு திட்டமொன்றை முன்வைக்க திட்டமிடப்பட்டுள்ளது. அதனை சலுகை வரவுசெலவு திட்டமாக முன்வைக்கவே நான் திட்டமிடுகிறேன். அதேபோல், இதுவரை நட்டத்தில் இயங்கிக் கொண்டிருக்கும் ஸ்ரீலங்கன் விமான சேவையை தனியார் மயப்படுத்துமாறு நான் முன்மொழிகின்றேன் . 2020 – 2021 ல் மட்டும் ஸ்ரீலங்கன் விமான சேவை 45 பில்லியன் ரூபாய்கள் நட்டமடைந்துள்ளது .2021 மார்ச் 31 ஆகும் போது இதன் மொத்த நட்டம் 372 பில்லியன்களாக இருந்தது. நாம் இதனை தனியார் மயப்படுத்தினாலும் இந்த நட்டத்தை நாமே ஏற்க நேரிடும். இந்த நட்டத்தை வாழ்கையில் ஒருமுறையாவது விமானத்தில் பயணிக்காத இந்த நாட்டின் ஏழை எளிய மக்களும் அனுபவிக்க வேண்டிய நிலை ஏற்பட்டுள்ளது என்பதை நீங்கள் தெரிந்து கொள்ள வேண்டும்.

குறுகிய காலத்திற்கு நாம் இதனை விட மோசமான காலத்திற்கு முகம் கொடுக்க ப் போகின்றோம். பணவீக்கம் மேலும் அதிகரிக்க இடமுள்ளது.

அரசாங்கம் தற்போது 92 பெற்றோல் லீட்டர் ஒன்றில் ரூ. 84.38 , 95 பெற்றோல் லீட்டர் ஒன்றில் ரூ. 71.19 , டீசல் லீட்டர் ஒன்றில்ரூ. 131.55 சுப்பன் டீசல் லீட்டர் ஒன்றில் ரூ. 136.31 மற்றும் மண்ணெண்ணெய் லீட்டர் ஒன்றில் ரூ. 294.50 என நட்டமடைகின்றது . பெற்றோலியக் கூட்டுத்தாபனத்தினால் இந்த நட்டத்தை மேலும் தாங்கிக் கொள்ள முடியாது. அதேப்போல இலங்கை மின்சாரசபை மின் அலகு ஒன்றிற்காக உங்களிடம் ரூ. 17 ஐ அறவிட்டாலும் அதன் பொருட்டு 48 ரூபாய்கள் வரை செலவு செய்கிறது . அதன்படி ஒரு அலகிற்கு 30 ரூபாய்கள் நட்டம் ஏற்படுகிறது. அதுவும் மோசமான சிக்கலாகும்.

நான் இந்த நேரத்தில் விருப்பப்படா விட்டாலும் பணத்தை அச்சடிப்பதற்கு அனுமதி வழங்க நேரிடும். அரச ஊழியர்களின் இந்த மாத சம்பளத்தை வழங்கவும் , உங்களுக்கு தேவையான பொருட்கள் சேவைகளின் பொருட்டே அதனை செய்யவுள்ளது. எவ்வாறாயினும் பணத்தை அச்சடிப்பதால் ரூபாவின் பெறுமதி குறையும் என்பதை நாம் நினைவில் வைக்க வேண்டும். தற்போதைய நிலையில் பெற்றோலியக் கூட்டுத்தாபனம் மற்றும் மின்சாரசபைக்குத் தேவையான நிதியைக்கூட தேடமுடியாதுள்ளது. எவ்வாறாயினும் எதிர்வரும் சில மாதங்களுக்கு நீங்களும் நானும் வாழ்க்கையில் மோசமான காலக்கட்டத்தை கடக்க நேரிடும். அதற்கு நாம் அனைவரும் அர்ப்பணிப்புடன் முகம் கொடுக்க வேண்டும்.

நான் மக்களுக்கு விடயங்களை மறைத்து பொய் சொல்வதற்கு எந்தவகையிலும் விரும்பவில்லை. பயங்கரமாக இருந்தாலும் அசிங்கமாக இருந்தாலும் இதுதான் உண்மையான நிலைமை. குறுகிய காலத்திற்கு நாம் கடந்த காலத்தைவிட மிகவும் கஸ்டமான காலத்திற்கு முகம் கொடுக்க போகின்றோம். இந்த நேரத்தில் நமக்கு கவலைப்பட மட்டுமே முடியும். ஆனால் இது குறுகிய காலத்திற்கு மட்டுமே. எதிர்வரும் சில மாதங்களில் எமது நட்பு நாடுகளின் உதவிகள் மற்றும் ஒத்துழைப்பு எமக்கு கிடைக்கும். அவர்கள் எமக்கு உதவி செய்வதாக உறுதியளித்துள்ளனர். அதன் பொருட்டு எதிர்வரும் சில மாதங்கள் நாம் பொறுமையுடன் இருக்க வேண்டும். ஆனால் இதில் இருந்து நாம் மீள முடியும். அதன்பொருட்டு நாம் புதிய வழிக்கு செல்ல நேரிடும். இந்த சந்தர்ப்பத்தில் தற்போதைய நிலைமை சம்பந்தமாக எதிர்கட்சி தலைவர் உட்பட கட்சித் தலைவர்களுக்கு அனுப்பிய கடிதங்களுக்கு பதிலளித்தமை குறித்து அவர்களுக்கு நன்றி கூறுகிறேன்.

தற்போது நிலவும் இந்த சிக்கல்களுக்கு தீர்வு காணும் பொருட்டு தேசிய சபை அல்லது அரசியல் சபை ஒன்றை அனைத்து கட்சிகளினதும் பங்கேற்புடன் உடனடியாக அமைக்க நடவடிக்கை எடுக்க வேண்டி உள்ளது. அதன் மூலம் அனைத்து தரப்பினருடனும் கலந்தாலோசித்து எட்டப்படும் தீர்மானத்திற்கு அமைய நிச்சயிக்கப்பட்ட காலப்பகுதிக்குள் பொதுவான குறுகிய கால- மத்தியக் கால – மற்றும் நீண்ட கால செயற்திட்டங்களை நடைமுறைப்படுத்தி நாட்டை மீண்டும் உயர்ந்த நிலைக்கு இட்டுச் செல்ல எம்மால் முடியும். மண்ணெண்ணெய், எரிவாயு, எரிபொருள் வரிசை இல்லாத நாடு, மின்சாரம் துண்டிக்கப்படாத நாடு , விவசாயத்தை சுதந்திரமாக மேற்கொள்ளக் கூடிய வசதிகள் உள்ள நாடு , இளைஞர் யுவதிகளின் நாளையதினம் பாதுகாக்கப்பட்ட நாடு, மனித வளம் போராட்டக் களத்தில் மற்றும் வரிசையில் வீணடிக்கத் தேவை இல்லாத நாடு, எல்லோரும் சுதந்திரமாக வாழ்க்கையை முன்னெடுத்துச் செல்லக் கூடிய நாடு , மற்றும் மூன்று வேளையும் உணவு உண்ணக் கூடிய நாட்டை நாம் கட்டியெழுப்புவோம்.

● நான் பொறுப்பேற்றது மிகவும் அபாயகரமான சவால். கத்தியின் மேல் நடப்பதைவிட இது பயங்கரமான சவால் மிகுந்தது. மிகவும் ஆழமானது. அடியே தெரியவில்லை. பாலங்கள் மெல்லிய கண்ணாடியால் அமைக்கப்பட்டுள்ளன. கைப்பிடி இல்லை. என்னுடைய கால்களில் கலற்ற முடியாத பாதணிகள் போடப்பட்டுள்ளன. அதன் அடியில் கூர்மையான இரும்பு ஆணிகள் பொருத்தப்பட்டுள்ளன. குழந்தையை பாதுகாப்பாக அடுத்த பக்கம் கொண்டு செல்ல வேண்டி உள்ளது. இந்த சவாலை நான் நாட்டிற்காகவே பொறுப்பேற்றேன்.எனது நோக்கமும் அர்ப்பணிப்பும் ஒரு தனிமனிதன் , ஒரு குடும்பம், அல்லது ஒரு கூட்டத்தை பாதுகாப்பது அல்ல முழு நாட்டினதும் மக்களை காப்பாற்றுதே, இளைஞர்களின் எதிர்காலத்தை காப்பாற்றுவதே .உயிரை பணயம் வைத்து இந்த சவாலுக்கு நான் முகம் கொடுப்பேன். அந்த சவாலை வெற்றி கொள்வேன். அதற்கு உங்கள் அனைவரினதும் ஒத்துழைப்பையும் எனக்கு பெற்றுத் தாருங்கள்.

நான் எனது கடமையை நாட்டிற்காக செய்து முடிப்பேன். அது நான் உங்களுக்கு அளிக்கும் உறுதியாகும். – என்றார் பிரதமர் .

Read more...

Saturday, May 7, 2022

யார் அவர், அவர் என்ன செய்கிறார்...? Who is she, What is he doing...?

பெயரால் அவர் ரணில் விக்ரமசிங்க ஆவார். இலங்கையில் ஐந்து முறை பிரதமராக இருந்த அவர் ஐக்கிய தேசியக் கட்சியின் தலைவராவார். மிக விரைவில் அவர் ஆறாவது பிரதமராகி தனது உலக சாதனையை தானே முறித்தாலும் ஆச்சரியப்படுவதற்கு ஒன்றுமில்லை.

2020 பொதுத் தேர்தலில் இலங்கையின் முதலாவதும் மிகப் பெரியதும் என்று அறியப்பட்ட அரசியல் கட்சியான ஐக்கிய தேசியக்கட்சியை சுடுகாட்டை நோக்கி வழிநடத்திய புகழிழந்த தலைவர் என்ற கண்டனத்துக்கு உள்ளாகிய தலைவரும் ரணில் விக்ரமசிங்கவே ஆவார். .

ஏதோ தட்டுத்தடுமாறி தேசியப் பட்டியல் மூலம் தேர்தல் முடிந்து சில மாதங்கள் கழிந்த பின்னரே பாராளுமன்றத்திற்குள் நுழைந்து கொண்டார் அவர். அவரது புதிய டீல் பற்றிய சில விஷயங்களை பேசுவதே இந்த கட்டுரையின் நோக்கமாகும்.

ரணில் விக்ரமசிங்கதான் ஆசியாவிலே இருக்கும் மிகத் திறமையான அரசியல் டீல்காரன் என்பது அவரை நன்கறிந்த பலருக்கும் தெரிந்த விடயம். பசில் ராஜபக்சவும் ஒரு நல்ல டீல்காரன் தான். ஆனால் வித்தியாசம் யாதெனில் அவருடைய டீல்கள் எவ்வளவு டாலர்கள் கைமாறுகின்றது என்பதைப் பொறுத்தே நிறைவேறும். ஆனால் ரணில் விக்ரமசிங்கவின் டீல்கள் அதிகாரத்திற்காகவே நிகழும். அவரது புதிய டீல் ஆனது பலருக்கு தெரியாது ஆனால் மிகவும் ஆபத்தான டீல் ஆகும்.

இக்குறிப்பிட்ட டீல் இல் நான்கு தரப்பினர்கள் உள்ளனர். அமெரிக்கா, இந்தியா, மிலிந்த மொரகொட மற்றும் ரணில் விக்கிரமசிங்க ஆகியோர் உள்ளடங்குவர். இந்த நகர்வுக்குப் பின்னால் ஒரு கதை உண்டு. இந்த டீலுக்கான நகர்வு முதலில் ஆரம்பமானது 2002ம் ஆண்டிலாகும். அப்போது அதை Regaining Sri Lanka (இலங்கையை மீட்டெடுப்போம்) என்ற பெயரில் அது அழைக்கப்பட்டது.

ஆனால் ரணில் விக்ரமசிங்க அரசாங்கத்திற்கு இதனைச் நோக்கி செயற்படுவதற்கு போதிய காலம் அன்று இருக்கவில்லை. 2004 ஆம் ஆண்டு ஜனாதிபதி சந்திரிக்கா தன்னிடமிருந்த அதிகாரத்திக்கொண்டு அவரது அரசாங்கத்தை 2004 கடைசியில் கலைத்து தேர்தலொன்றை நடத்தினார். அத்தேர்தலில் ரணில் விக்கிரமசிங்க சிறிதளவான ஆசனங்களின் எண்ணிக்கையில் தோல்வியடைந்ததால் எதிர்க்கட்சிக்கு தள்ளப்பட்டார். எனவே Regaining Sri Lanka (இலங்கையை மீட்டெடுப்போம்) திட்டத்தை அப்போது அவர் செயல்படுத்த முடியாத நிலையில் இருந்தார்.

2005ல் மகிந்த ராஜபக்ச அதிகாரத்திற்கு வந்ததும் Regaining Sri Lanka (இலங்கையை மீட்டெடுப்போம்) திட்டம் கிடப்பில் போடப்பட்டது. இத்திட்டமானது 2015-2019 ஆண்டு மைத்ரீபால - ரணில் ஆட்சிக்க் காலகட்டத்தில் MCC ஒப்பந்தம் என்ற பெயரில் மீண்டும் களத்தில் இறக்கப்பட்டது. அதனை நடைமுறைப்படுத்துவதற்கு எதிராக அரசியல் கட்சிகள் , சிவில் அமைப்புகள், தொழில்சார் அமைப்புகள் கடுமையாகக் குரல் கொடுத்ததால் அதனை மீண்டும் கிடப்பில் போட நேர்ந்தது.

எனினும் 2019 ஜனாதிபதி தேர்தலுக்கான திகதி அறிவிப்பு வெளியிடப்பட்ட பின்னர் உடதும்பர காஸ்ஸப்ப என்ற ஒரு பெளத்த பிக்கு சுதந்திர சதுக்கத்தில் சாகும்வரை உண்ணாவிரதம் இருந்ததோடு, அப்போது ஜனாதிபதி தேர்தலில் போட்டியிடுவதற்கு வேட்பாளராக தெரிவு செய்யப்பட்டிருந்த கோத்தாபய ராஜபக்சவிடம் அந்த MCC ஒப்பந்தத்தில் கையொப்பமிட மாட்டேன் என்ற எழுத்துமூல வாக்குறுதி ஒன்றையையும்கூட பெற்றுக்கொண்டார். அது அவர்களின் தேர்தல் அரசியலுக்கான சுத்துமாத்து வேலையாக இருந்தாலும் பெளத்த பிக்கு தெரிந்தோ தெரியாமலோ அதற்குள் அகப்பட்டார். அவருக்கு நாம் சொல்லக்கூடியது அன்று நிறுத்திய இடத்திலிருந்து உண்மையான உண்ணாவிரதத்தை மீண்டும் ஆரம்பிக்க தயாராகுங்கள் என்பதாகும்.

ரணில் விக்ரமசிங்க மட்டுமே இன்று அரசாங்கத்தின் ஒரே ஒரு மீட்பராக இருக்கின்றார். கடந்த சில நாட்களில் பாராளுமன்றத்தில் நடக்கும் விஷயங்கள் உற்று நோக்கும்போது அவரே இன்று அரசாங்கத்தின் ஆலோசர், கொள்கை வகுப்பாளர் மற்றும் இடைத்தரகர் ஆகிய மூன்று பாத்திரங்களையும் வகிப்பது தெளிவாகின்றது.

மே 5 ஆம் தேதி நாடாளுமன்றத்தில் பொய்யாக சுயாதீனமாக இயங்கப்போவதாக கூறியவர்களுள் ஒருவரான நாடாளுமன்ற உறுப்பினர் ரஞ்சித் சியம்பலாபிட்டிய உதவி சபாநாயகராக நியமிக்கப்பட்டார். அவ்வாறு நியமிக்கப்படும்போது அவருக்கு வாக்களிக்கும்படி பா.உறுப்பினர்களுக்கு ரணில் விக்கிரமசிங்க அழுத்தம் கொடுத்தார் என பா.உறுப்பினர் இராசமாணிக்கம் வெளிப்படையாக கூறினார். இந்த இடத்தில் ரணில் ஒரு இடைத்தரகர் வேலையைச் செய்தார். ஆனால் அவரால் அதை வெற்றிகரமாகச் செய்ய முடியவில்லை.

அத்துடன் ஐக்கிய மக்கள் சக்தி என்னும் சமகி ஜன பலவேகய இனரால் கொண்டுவரவிருந்த நம்பிகையில்லாப் பிரேரணை பின்போடப்படுவதற்கு ரணில் தன் தலையீட்டை சய்தார். எவ்வாறாயினும் பல வாரங்களாக பின்போடப்பட்டு பின்போடப்பட்டு அது சபாநாயகரிடம் கையளிக்கப்பட்டாலும், அது பற்றிய விவாதம் பின்போடப்பட்டதன் பின்னணியிலும் ரணில் விக்கிரமசிங்க இருக்கின்றார். அவர் ஒரு காலமும் மகிந்த ராஜபக்ச ஒரு நம்பிக்கையில்லா தீர்மானத்தின் மூலம் தோற்கடிக்கப்பட அவர் அனுமதிக்கமாட்டார்.

MCC ஒப்பந்தத்தின் புதிய திட்ட வடிவம் 2021 ஆண்டு தொடக்கத்தில் மீளமைக்கப்பட்டது. Path Finder ( பாத்ஃபைண்டர்) நிறுவனத்தின் உரிமையாளரான, மிலிந்த மொரகொட இந்தியாவின் ஸ்ரீ லங்கா தூதுவராக நியமிக்கப்பட்டமை இந்த ரணில், அமெரிக்க இந்தியத் திட்டத்தின் முதல் கட்ட நடவடிக்கையாகும். மிலிந்த மொரகொட என்பவர் அமெரிக்காவிற்கு மிகவும் நெருங்கியவர் என்பதோடு Regaining Sri Lanka (இலங்கையை மீட்டெடுப்போம்) திட்டத்தை உருவாக்கியவருமாவார்.

இத்திட்டத்தை நடைமுறப்படுத்துவதற்கான களத்தையும் சூழலையும் உருவாக்கிக்கொள்ளுவதற்கு ஏதுவாக, பாத்ஃபைண்டர் நிறுவனத்தில் பணிபுரிந்த ஓய்வு பெற்ற முன்னாள் கடற்படை தளபதியான ஜெயநாத் கொலொம்பகே என்பவரை வெளியுறவு அமைச்சின் செயலாளராக பணியமர்த்தினர்.

அதன் பின்னர் இந்தியா திரை மறைவில் இருந்தபடி மிக்க கவனத்துடன் அமெரிக்க குடியுரிமை பெற்றவரான பசில் ராஜபக்சவை நிதி அமைச்சர் பதவிக்கு கொண்டுவருவதற்கு பெரும்பங்காற்றி அதை நிறவேற்றியது. இதன் மூலம் அவர்களின் எதிர்பார்ப்பு இலங்கையை சீனாவின் ஆதிக்கத்திலிருந்து விலத்துவதாகும். ஆனால் இதற்கிடையே இலங்கை பொருளாதார ரீதியாக வீழ்ச்சியடைந்து கிடக்கிறது என்பதை இந்தியா நன்றாக புரிந்தே இருந்தது.

இப்போது இலங்கை பெரும் கடன் பொறிக்குள் சிக்கியுள்ளது. இலங்கையின் மொத்தக் கடன் தொகை 51 பில்லியன் டாலர்களாகும். அதில் 18.5 பில்லியன்கள் 2015-2019 ஆம் ஆண்டுக் காலத்தில் ரணில் விக்கிரமசிங்க ஆட்சிக்காலத்தில் வாங்கிய கடன்களாகும். அதில் இறையாண்மைப் பத்திரக் கடன்கள் (Sovereign bond loans) 51 பில்லியன் டாலர்களாகும். ஏனைய 6.5 பில்லியனானது இருதரப்பு அல்லது பல்தரப்பு (Bilateral and multilateral loans) கடன்களாகும்.

ஆனால் யாருமே இந்தக் கடன்கள் பற்றி பேசுவதில்லை. சஜித் பிரேமதாஸ , லக்ஷ்மன் கிரிஎல்ல, மற்றும் பொருளியல் கலாநிதி ஹர்ஷ த சில்வா, எரான் விக்ரமரத்ன போன்றவர்கள் சொல்லும் கதைகளின்படி இக்கடன்கள் அனைத்தும் மகிந்த ராஜபக்ச அரசாங்கத்தின் தவறுகளால் குவிந்தவை என்பதாகும். இவர்கள் எல்லோரும் அன்றைய ரணில் அரசாங்கத்தில் இருந்த முக்கிய அமைச்சர்களாவர். அவர்கள் எல்லோரும்கூட இன்றைய இந்த பொருளாதார நெருக்கடிக்கு பொறுப்புச் சொல்ல வேண்டியவர்களே. அதே போல் 2015-2019 ஆட்சிக் காலத்தில் நிகழ்ந்த பாரிய நிதி ஊழலும் கூட இன்றைய நெருக்கடிக்கு பங்கு வகித்துள்ளது என்பதயும் கூறிவைக்க வேண்டியுள்ளது.

தற்போது இலங்கை கழுத்துவரை கடனில் மூழ்கிப்பொயுள்ளது. இந்தியா மற்றும் அமெரிக்காவிற்கு தேவையானதை நிறைவேற்றிக்கொள்ள ஏதுவாக சகலதும் தயாராகி உள்ளது. ஒரு இடைக்கால அரசாங்கத்தை உருவாக்குவத்ற்கு ஜனாதிபதி கோட்டாபய ராஜபக்ஷ நடவடிக்கை எடுக்கக்கூடும். அதில் ரணில் விக்கிரமசிங்கவை பிரதமராக்கி ஏனைய சில கட்சிகளைச் சேர்ந்தவர்களையும் கொண்டு ஒரு அமைச்சரவையை உருவாக்கலாம்.

பின்னர் வழக்கறிஞர்கள் சங்கம் முன்மொழிந்துள்ளத மாதிரியை ஒத்த வடிவிலான கட்டமைப்பில் அரசாங்கத்தின் எஞ்சிய இரண்டாண்டு காலத்தை கொண்டு நடத்தலாம். இலங்கைக்குள் அமெரிக்காவிற்கு அவசியமானவைகள் இவ்வளவு காலம் இந்தியாவுக்கு ஊடாக செயற்படுத்தப்பட்டு வந்திருந்தாலும், இனிமேல் ரனில் விக்கிரமசிங்கவுக்குவுக்கு ஊடாக நேரடியாக இலங்கையில் நடைமுறைப்படுத்தப்படும்.

நாட்டின் அடிப்படைப் பொருளாதார பிரச்சினைகளைத் தீர்ப்பதற்குத் தேவையான சில பணப் பங்கீடுகள் அமெரிக்கா மற்றும் இந்தியாவினால் வழங்கப்பட்ட, மக்களின் அன்றாடப் பிரச்சினைகளை தீர்ப்பதற்குத் தேவையான நடவடிக்கைகள் மேற்கொள்ளப்பட்டு, நாட்டில் தற்போதுள்ள எழுச்சி ஆர்ப்பாட்டங்கள் முடிவுக்கு கொண்டுவரப்படலாம்.

அந்த வகையில் அவர்கள் அரசாங்கத்தின் செயற்பாடுகளை எப்படியோ முன்னகர்திச் செல்லக்கூடும் . அதன்பிறகு, 2002 ஆம் ஆண்டு தன்னால் செய்ய முடியாமற் போனதை ரனில் விக்கிரமசிங்க 2022 ஆம் ஆண்டில் அமெரிக்காவிற்காக வெற்றிகரமாக அவர் செய்து முடிப்பார். அதன் பின்னர் சீனாவின் ஆதிக்கத்தை முறியடிப்பது என்ற பெயரில் இந்திய அமெரிக்க ஆதிக்கமானது இலங்கையை விழுங்கிக் கொள்ளும். ரணில் விக்ரமசிங்க இலங்கையை மீழ முடியாத ஒரு பொறிக்குள் சிக்க வைத்துவிட்டு அவர் ஒய்வு பெறுவார். இனி இலங்கையை கோடானகோடி தேவர்கள்தான் காப்பாற்ற வேண்டும்.

சாந்த ஜெயரத்ன
முன்னாள் சிரேஷ்ட ஆலோசகர்
ஸ்ரீ லங்கா அபிவ்ருத்தி நிர்வாக நிறுவனம்
Sri Lanka Institute of Development Administration (SLIDA)

தமிழில் மனோரஞ்சன்

Read more...
Copyright www.ilankainet.com All right reserved.
Designed and Hosted By : ilankainet.com
To contact us : ilankainet@gmail.com