பயனாளர்களின் அந்தரங்கத் தகவல்களை மைக்ரோசாப்ட், அமேசான் உள்ளிட்ட டெக் நிறுவனங்களுக்கு ஃபேஸ்புக் அளிக்கிறதா?

நியூயார்க் டைம்சின் அதிர்ச்சி ரிப்போர்ட்

சமூகவலைத்தள மிகப்பெரிய நிறுவனமான ஃபேஸ்புக், பயனாளர்கள் தங்களின் நட்பு வட்டத்துக்காக பகிர்ந்து கொள்ளும் அந்தரங்கத் தகவல்களை மைக்ரோசாஃப்ட், அமேசான் உள்ளிட்ட மகா தொழில் நுட்ப நிறுவனங்களுக்கு அளிப்பதாக பகீர் தகவல் வெளியாகியுள்ளது.

அதாவது பேஸ்புக் தான் ஒப்புக் கொண்ட தகவல்பகிர்வுக்கும் அப்பால் சிலபல தகவல்கள் தொழில் நுட்ப நிறுவனங்களிடம் பகிரப்படுவதாக புகார் எழுந்துள்ளது.

ஃபேஸ்புக் தன் பயனாளர்களின் அந்தரங்கத் தகவல்களை வாசிக்க நெட்பிளிக்ஸ், ஸ்பாட்டிஃபை ஆகிய நிறுவனங்களுக்கு வசதி செய்து கொடுப்பதாக கடும் குற்றச்சாட்டு எழுந்துள்ளது.

மைக்ரோசாஃப்ட் தேடல் எந்திரமான ‘பிங்’ பேஸ்புக் பயனாளர்களின் நண்பர்களின் தகவல்களை தங்கல் தேடல் எந்திரம் மூலம் அணுக பேஸ்புக் அனுமதிக்கிறது, அனுமதியின்றி இதைச் செய்வதாகத் தெரிகிறது. இதே போல்தான் அமேசானும் பயன்படுத்திக் கொள்ள பேஸ்புக் அனுமதிப்பதாக செவ்வாயன்று நியுயார்க் டைம்ஸ் அதிர்ச்சி செய்தி அறிக்கை வெளியிட்டுள்ளது.

ஏற்கெனவே 87 மில்லியன் பேஸ்புக் பயனாளர்களின் தகவல்களை கேம்பிரிட்ஜ் அனலிட்டிக்காவுக்கு பகிரப்பட்ட மோசடியில் சிக்கித் தவிக்கும் பேஸ்புக், சுமார் 150 நிறுவனங்களுக்கு பேஸ்புக் பயனாளர்கள் தகவல்களைப் பெற வசதி செய்து கொடுத்துள்ளதாக நியூயார்க் டைம்ஸ் ரிப்போர்ட் தெரிவிக்கிறது. குறிப்பாக ஆன்லைன் வர்த்தக ராட்சத நிறுவனங்கள், பொழுதுபோக்கு ஊடக நிறுவனங்கள், வாகனத் தயாரிப்பாளர்கள், மற்றும் ஊடக நிறுவனங்கள் சிலவற்றுக்கும் கூட பயனாளர்கள் தகவல்கள் அணுக முடிவதாக இருக்கிறது.

அமெரிக்க ஃபெடரல் டிரேட் கமிஷனின் நுகர்வோர் பாதுகாப்புக் கழகத்தை நடத்துபவரான டேவிட் விளாடெக், “சம்பந்தமில்லாத 3ம் நபர்கள் குறிப்பாக பெரிய நிறுவனங்கள் பயனாளர்களின் அனுமதி பெறாமல் தகவல்கள் பகிரப்படுகின்றன” என்றார்.

மேலும் இது குறித்த 270 பக்க அறிக்கையில் பாதுகாப்பு ஏற்பாடுகளையும் மீறி பயனாளர்கள் தகவல்கள் பல நிறுவனங்களுக்குப் பகிரப்படுவதாக கூறப்பட்டுள்ளது.

வேடிக்கை என்னவெனில் பகிரமுடியாது என்று செயலிழக்கச் செய்தாலும் தகவல்கள் எப்படியோ கசிகின்றன. மார்க் ஸுக்கர்பர்க், அமெரிக்க நாடாளுமன்றத்தில் அனைவரது தகவல்களும் பாதுகாக்கப்படும் என்று உறுதியளித்த நிலையிலும் இது தொடர்வது கவலையளிக்கிறது என்று பெடரல் ட்ரேட் கமிஷன் உணர்கிறது.

நன்றி பிபிசி தமிழ்