சுற்றுலாவிற்காக இஸ்லாமிய கலாசாரங்களை விட்டுக் கொடுத்த பல்கலை மாணவிகள்!

கல்வி சுற்றுலா சென்ற யாழ் பல்கலைக்கழக நான்காம் வருட சித்திரமும் வடிவமைப்பும் துறை மாணவர்களில் முஸ்லீம் மாணவிகள் வரலாற்று முக்கியத்துவ இடங் களை பார்க்க அனுமதிக்கப்படாத காரணத்தால் வெளியில் காத்திருந்த சம்பவம் நேற்று நடைபெற்றுள்ளது.

இவர்களின் இந்தச்சுற்றுலா இலங்கையின் வரலாற்று முக்கியத்துவம் வாய்ந்த இடங்களை பார்வையிடுவதற்காக அமைந்ததுடன், நேற்று காலை அனுராதபுரத்தில் அமைந்துள்ள வரலாற்று சிறப்புமிக்க இடங்களை பார்வையிட சென்றபோது இவர்களுடன் வந்த முஸ்லீம் மாணவிகளை அங்கு காவற்கடமையில் இருந்தவர்கள் அனுமதியாது தடுத்துள்ளனர்.

குறித்த இடத்தை பார்ப்பதாயின், முஸ்லீம் மாணவிகள் அணிந்திருந்த முக்காடு, ஹிஜாப் என்பன அகற்றப்பட வேண்டும் என தெரிவித்ததால் அம்மாணவிகள் ஏனைய மாணவர்கள் போன்று குறித்த இடங்களை பார்க்க முடியாமல் போனதை கண்ட சக மாணவர்கள் முஸ்லீம் மாணவிகள் தலையில் அணிந்து வந்த முக்காடு ஹிஜாப் போன்றவற்றை களையுமாறு வேண்டியதை தொடர்ந்து தமது முக்காடு ஹிஜாப் களைந்துவிட்டு மாணவர்களுடன் ஒன்றாக சேர்ந்து வரலாற்று சிறப்பு மிக்க இடங்களை பார்வையிட்டனர்.

குறிப்பாக வரலாற்று சிறப்பு மிக்க இடங்களை பார்வையிட வரும் போது அங்கு பாதுகாப்பு கடமையில் உள்ளவர்களால் செருப்பு மற்றும் தொப்பி என்பன அணிவதை தவிர்க்குமாறு வலியுறுத்தப்பட்டுள்ளமை குறிப்பிடத்தக்கது.